அடுத்த கட்டத்தை நோக்கி நகரும் அனோஜனின் தண்டனைக்கு எதிரான சட்ட நடவடிக்கை

சவூதி அரேபியாவில் மரண தண்டனை விதிக்கப்பட்டுள்ள இலங்கைப் பிரஜையான அனோஜன் சிவராசாவுக்கு ஆதரவாக, அந்நாட்டின் உச்ச நீதிமன்றத்தில் தாக்கல் செய்யப்படவுள்ள மேன்முறையீடு இறுதிப்படுத்தப்பட்டுள்ளது. இலங்கைச் சட்டத்தரணிகள் குழுவின் ஆலோசனைகளைத் தொடர்ந்து, இந்த மேன்முறையீடு விரைவில் தாக்கல் செய்யப்படும் என எதிர்பார்க்கப்படுகிறது.

முகநூலில் (Facebook) இஸ்லாமிய இறைத்தூதர் முஹம்மதுவை அவமதிக்கும் வகையிலான பதிவு ஒன்றை வெளியிட்டதாகக் கூறப்படும் குற்றச்சாட்டின் அடிப்படையில், அனோஜன் சிவராசாவுக்கு சவூதி அரேபிய மேன்முறையீட்டு நீதிமன்றம் மரண தண்டனை விதித்திருந்தது.

இதற்கு முன்னர், கீழ் நீதிமன்றம் அவருக்கு ஐந்து ஆண்டுகள் சிறைத்தண்டனை விதித்திருந்தது. எனினும், அரசுத் தரப்பு சட்டத்தரணி தாக்கல் செய்த மேன்முறையீட்டைத் தொடர்ந்து, அந்தத் தீர்ப்பை மாற்றிய மேன்முறையீட்டு நீதிமன்றம் மரண தண்டனை விதித்தது. குறித்த குற்றச்சாட்டை இஸ்லாமியச் சட்டத்தின் கீழ் இறைவனுக்கு எதிரான குற்றங்களாகக் கருதப்படும் “ஹத்” (Hadd) வகைக் குற்றமாகவும் நீதிமன்றம் வகைப்படுத்தியிருந்தது.

இந்தத் தீர்ப்பைத் தொடர்ந்து, அனோஜன் சிவராசாவின் வழக்கில் அடுத்தகட்ட சட்ட நடவடிக்கைகளை முன்னெடுப்பதற்காக இலங்கைச் சட்டத்தரணிகள் குழுவொன்று சவூதி அரேபியாவுக்குச் சென்றது. அங்கு, அனோஜன் சிவராசாவின் வழக்கைக் கையாளும் சட்டத்தரணிகளுடன் பல சுற்று ஆலோசனைகளை நடத்திய அந்தக் குழு, உச்ச நீதிமன்றத்தில் சமர்ப்பிக்கப்படவுள்ள சட்டரீதியான ஆவணங்களை இறுதிப்படுத்துவதற்கும் உதவியது.

சவூதி அரேபியாவின் உயரிய நீதித்துறை அதிகாரமாக விளங்கும் உச்ச நீதிமன்றம், கீழ் நீதிமன்றங்களின் தீர்ப்புகளைப் பிரதானமாக சட்ட மற்றும் நடைமுறை அடிப்படைகளில் மீளாய்வு செய்கிறது.

இலங்கைச் சட்டத்தரணிகள் குழுவில் மேலதிக சொலிசிட்டர் ஜெனரலும் ஜனாதிபதி சட்டத்தரணியுமான அசார்ட் நவாவி, ஜனாதிபதி சட்டத்தரணிகளான பைசர் முஸ்தபா மற்றும் உபுல் குமாரப்பெரும, சட்டத்தரணி ஹபீல் பாரிஸ் ஆகியோர் இடம்பெற்றிருந்தனர்.

சவூதி அரேபியாவுக்கான இலங்கைத் தூதுவர் அமீர் அஜ்வாட், ஜித்தாவிலுள்ள இலங்கைத் துணைத் தூதரகத்தின் தூதரகத் தலைவர் நீதியரசர் மொஹமட் லஃபார் மற்றும் சில்மி ரியாஸ்தீன் ஆகியோரும் இந்தச் செயல்முறையில் பங்கேற்றனர். இதற்கிடையில், அனோஜன் சிவராசாவின் வழக்கில் தீர்வு காண்பதற்கான முயற்சிகள் தொடர்ந்த நிலையில், தூதுவர் அமீர் அஜ்வாட் முன்னதாக சிறைச்சாலைக்குச் சென்று அனோஜன் சிவராசாவைச் சந்தித்திருந்தார்.

இந்நிலையில், மரண தண்டனைக்கு எதிரான மேன்முறையீடு விரைவில் சவூதி அரேபிய உச்ச நீதிமன்றத்தில் தாக்கல் செய்யப்படவுள்ளது. இதன் மூலம், அனோஜன் சிவராசாவுக்கு விதிக்கப்பட்ட மரண தண்டனையை எதிர்த்து முன்னெடுக்கப்படும் சட்ட நடவடிக்கைகள் அடுத்த கட்டத்தை எட்டவுள்ளன.