சவூதி அரேபியாவின் மக்கா பிராந்தியத்தை நோக்கி யேமனின் ஹூதி கிளர்ச்சியாளர்களால் ஏவப்பட்ட ஆளில்லா விமானம் (ட்ரோன்) இடைமறித்து அழிக்கப்பட்டுள்ளதாக சவூதி தலைமையிலான கூட்டணிப் படை அறிவித்துள்ளது.
ஹூதி அமைப்பினரால் ஏவப்பட்ட ட்ரோன் மக்கா பிராந்தியத்தில் இடைமறித்து அழிக்கப்பட்டதாக கூட்டணிப் படையின் பேச்சாளர் துர்கி அல் மாலிகி தனது எக்ஸ் (X) சமூக ஊடகப் பதிவில் தெரிவித்துள்ளார்.
இதற்கு முன்னதாக, மேற்கு சவூதி அரேபியாவை இலக்காகக் கொண்டு ஹூதி கிளர்ச்சியாளர்களால் ஏவப்பட்ட குரூஸ் ஏவுகணையையும் கூட்டணிப் படையின் வான் பாதுகாப்புப் பிரிவினர் இடைமறித்து அழித்ததாக அவர் குறிப்பிட்டுள்ளார்.
சவூதி தலைமையிலான கூட்டணிப் படைக்கும் ஹூதி கிளர்ச்சியாளர்களுக்கும் இடையிலான மோதல்கள் அண்மைய நாட்களில் தீவிரமடைந்துள்ள நிலையில் இந்தச் சம்பவங்கள் இடம்பெற்றுள்ளன. இரு தரப்பினரும் அண்மைக்காலமாகப் பல்வேறு இராணுவ நடவடிக்கைகள் மற்றும் தாக்குதல்கள் தொடர்பான தகவல்களை வெளியிட்டு வருகின்றனர்.
இதற்கிடையில், சவூதி அரேபியாவில் உள்ள எண்ணெய் நிலையங்கள் மற்றும் விமான நிலையங்கள் உள்ளிட்ட இலக்குகளை நோக்கி வியாழக்கிழமை ஆறு தாக்குதல்களை நடத்தியதாக ஹூதி கிளர்ச்சியாளர்கள் அறிவித்துள்ளனர்.
யேமனில் 2014ஆம் ஆண்டு செப்டெம்பர் மாதம் தலைநகர் சனாவைக் கைப்பற்றிய ஹூதி கிளர்ச்சியாளர்களுக்கு எதிராக, சர்வதேச அங்கீகாரம் பெற்ற அரசாங்கத்திற்கு ஆதரவாக சவூதி தலைமையிலான கூட்டணிப் படை 2015ஆம் ஆண்டு மார்ச் மாதம் முதல் யேமன் மோதலில் ஈடுபட்டு வருகின்றமை குறிப்பிடத்தக்கது.
