இந்தியாவின் கிழக்கு மாநிலமான மேற்கு வங்கத்தின் கொல்கத்தா நகரில், சனிக்கிழமை மாலை நடைபெற்ற துர்கா பூஜை விழாவின் போது ஏற்பட்ட கூட்ட நெரிசலில் சிக்கி குறைந்தது 19 பேர் உயிரிழந்துள்ளதுடன், மேலும் 25 பேர் காயமடைந்துள்ளனர்.
வடக்கு கொல்கத்தாவில் அமைந்துள்ள சோர்பகன் சர்வஜனின் துர்கா பூஜை விழா மண்டபத்தில், அதிகளவான பக்தர்கள் திரண்டிருந்த நிலையில், பெய்த கடும் மழைக்கு மத்தியில் இந்தச் சம்பவம் இடம்பெற்றுள்ளது.
மழை பெய்துகொண்டிருந்த போது பக்தர்கள் வெளியேறத் தொடங்கியதை அடுத்து, வெளியேறும் வாயிலுக்கு அருகில் கூட்ட நெரிசல் ஏற்பட்டதாகப் பொலிஸார் தெரிவித்துள்ளனர். இதன்போது பலர் தடுமாறி விழுந்ததால் நெரிசல் மேலும் அதிகரித்து இந்த அனர்த்தம் ஏற்பட்டுள்ளது.
இந்தச் சம்பவம் தொடர்பில் கூட்டத்தைக் கட்டுப்படுத்துவதிலும் பாதுகாப்பு ஏற்பாடுகளை மேற்கொள்வதிலும் குறைபாடுகள் ஏற்பட்டனவா என்பது குறித்து அதிகாரிகள் விசாரணைகளை ஆரம்பித்துள்ளனர்.
விழா ஏற்பாட்டுக் குழு உறுப்பினர்கள் மற்றும் பாதுகாப்புப் பணியாளர்கள் உள்ளிட்ட ஏழு பேர் இச்சம்பவம் தொடர்பில் கைது செய்யப்பட்டுள்ளனர்.
இதனிடையே, இந்தத் துயரச் சம்பவம் குறித்து விசாரணை நடத்துவதற்காக, கொல்கத்தா உயர் நீதிமன்றத்தின் பதவியிலுள்ள நீதிபதி தலைமையில் விசேட விசாரணைக் குழுவொன்று அமைக்கப்படும் என மேற்கு வங்க முதலமைச்சர் சுவேந்து அதிகாரி அறிவித்துள்ளார்.
உயிரிழந்த ஒவ்வொருவரின் குடும்பத்துக்கும் தலா 200,000 இந்திய ரூபாயும், காயமடைந்த ஒவ்வொருவருக்கும் தலா 50,000 இந்திய ரூபாயும் நிவாரணமாக வழங்கப்படும் என இந்தியப் பிரதமர் நரேந்திர மோடி அறிவித்துள்ளார்.
