சிறையில் அடைக்கப்பட்டுள்ள முன்னாள் பாகிஸ்தான் பிரதமர் இம்ரான் கானை விடுதலை செய்யக் கோரி அவரது ஆதரவாளர்கள் பாகிஸ்தானின் வடமேற்கு பகுதியில் இருந்து போராட்டப் பேரணியை ஆரம்பித்துள்ளனர்.
அரசாங்கத்துக்கும் இம்ரான் கானின் பாகிஸ்தான் தெஹ்ரீக்-இ-இன்சாஃப் (PTI) கட்சி தலைமையினருக்கும் இடையே போராட்டத்தை கைவிடுவது தொடர்பாக நடத்தப்பட்ட பேச்சுவார்த்தைகள் தோல்வியடைந்ததைத் தொடர்ந்து இந்தப் பேரணி முன்னெடுக்கப்பட்டுள்ளது.
நேற்று ஞாயிற்றுக்கிழமை ஆரம்பமான இந்தப் பேரணியில் 5,000க்கும் மேற்பட்டோர் பங்கேற்றதாக தெரிவிக்கப்பட்டுள்ளது. செப்டம்பர் 27ஆம் திகதி நடத்த திட்டமிடப்பட்டிருந்த பேரணி, அரசாங்கத்துக்கும் தெஹ்ரீக்-இ-இன்சாஃப் கட்சி தலைமையினருக்கும் இடையே பேச்சுவார்த்தைகள் இடம்பெறுவதற்காக ஒக்டோபர் 4ஆம் திகதிக்கு ஒத்திவைக்கப்பட்டது.
எனினும், வார இறுதியில் இரு தரப்பினருக்கும் இடையே இடம்பெற்ற இரண்டு சுற்றுப் பேச்சுவார்த்தைகளிலும் உடன்பாடு எட்டப்படாததால், திட்டமிட்டபடி போராட்டத்தை முன்னெடுக்க தெஹ்ரீக்-இ-இன்சாஃப் கட்சி தீர்மானித்துள்ளது.
2023ஆம் ஆண்டு ஆகஸ்ட் மாதம் முதல் சிறையில் உள்ள இம்ரான் கானை விடுதலை செய்ய அரசாங்கத்துக்கு அழுத்தம் கொடுப்பதே இந்தப் போராட்டத்தின் முக்கிய நோக்கமாகும்.
தொடர்ச்சியான நீதிமன்ற தீர்ப்புகளுக்குப் பின்னர் அவர் சிறையில் அடைக்கப்பட்டுள்ள நிலையில், அந்த வழக்குகள் அரசியல் நோக்கம் கொண்டவை என தெஹ்ரீக்-இ-இன்சாஃப் கட்சி குற்றஞ்சாட்டி வருகிறது. அவருக்கு எதிரான தீர்ப்புகளில் ஒன்றைத் தவிர ஏனையவை மேன்முறையீடுகளின் போது இடைநிறுத்தப்பட்டுள்ளன அல்லது இரத்து செய்யப்பட்டுள்ளன.
தெஹ்ரீக்-இ-இன்சாஃப் கட்சியின் ஆட்சியில் உள்ள கைபர் பக்துன்க்வா மாகாணத்தின் பல்வேறு பகுதிகளில் இருந்து ஆதரவாளர்கள் பேரணியில் இணைந்து வாகனத் தொடரணிகளாக புறப்படும் காட்சிகள் கட்சியின் அதிகாரப்பூர்வ சமூக ஊடகங்களில் வெளியிடப்பட்டுள்ளன.
கைபர் பக்துன்க்வா முதலமைச்சர் சொஹைல் அஃப்ரிடியும் இம்ரான் கானுக்கு ஆதரவான போராட்டம் திட்டமிட்டபடி நடைபெறும் என முன்னதாக அறிவித்திருந்தார்.
போராட்டக்காரர்கள் வியாழக்கிழமைக்குள் இஸ்லாமாபாத்துக்கு மேற்கே சுமார் 80 கிலோமீட்டர் தொலைவில் உள்ள கைராபாத் பகுதியை சென்றடைவார்கள் என்றும், அங்கு போராட்டத்தின் “அடுத்த கட்டம்” தொடர்பான திட்டம் அறிவிக்கப்படும் என்றும் அவர் தெரிவித்துள்ளார்.
போராட்டக்காரர்களுக்கு அரசாங்கம் எச்சரிக்கை
தெஹ்ரீக்-இ-இன்சாஃப் கட்சி ஆதரவாளர்கள் இஸ்லாமாபாத்தை நோக்கி வருவதற்கு முன்னதாகவே, அவர்களைத் தடுப்பதற்கான நடவடிக்கைகளை அரசாங்கம் பல வாரங்களாக முன்னெடுத்து வருகிறது. தலைநகருக்குச் செல்லும் பிரதான வீதிகளைத் தடுக்க கப்பல் கொள்கலன்களைப் பயன்படுத்தி தடுப்புகள் அமைக்கப்பட்டுள்ளன.
இரு தரப்பினருக்கும் இடையிலான பேச்சுவார்த்தைகள் தோல்வியடைந்துள்ளதாக உள்துறை அமைச்சர் மொஹ்சின் நக்வி ஞாயிற்றுக்கிழமை உறுதிப்படுத்தியுள்ளார். பேச்சுவார்த்தைகளை சீர்குலைத்ததாக அஃப்ரிடி மீது அவர் குற்றஞ்சாட்டியதுடன், தெஹ்ரீக்-இ-இன்சாஃப் கட்சி “அமைதியின்மையை ஏற்படுத்த” அரசாங்கம் அனுமதிக்காது என்றும் தெரிவித்துள்ளார்.
செப்டம்பர் 14ஆம் திகதி இஸ்லாமாபாத் உயர் நீதிமன்றம் வழங்கிய உத்தரவையும் அமைச்சர் சுட்டிக்காட்டியுள்ளார். அதன்படி, எந்தவொரு அரசியல் கட்சிக்கும் அல்லது அதன் தலைமைக்கும் இஸ்லாமாபாத்தில் பொது வீதிகள், நெடுஞ்சாலைகள், சந்திப்புகள், சுங்கச்சாவடிகள் மற்றும் அரச கட்டடங்களை ஆக்கிரமிக்கும் சட்டபூர்வ உரிமை இல்லை என நீதிமன்றம் தெரிவித்திருந்தது.
இந்த உத்தரவை மீறுபவர்கள் கைபர் பக்துன்க்வா மாகாணத்திற்குள்ளோ அல்லது அதற்கு வெளியிலோ போராட்டத்தில் ஈடுபட்டாலும், தனித்தனியாக நடவடிக்கை எடுக்கப்படும் என மொஹ்சின் நக்வி எச்சரித்துள்ளார்.
73 வயதான இம்ரான் கானின் உடல்நிலை தொடர்பான கவலைகளும், குறிப்பாக அவரது வலது கண்ணுக்கு நீண்டகாலமாக சிறப்பு சிகிச்சை தேவைப்பட்டு வருவதும், அவரை விடுதலை செய்யக் கோரும் தெஹ்ரீக்-இ-இன்சாஃப் கட்சியின் பிரசாரத்துக்கு முக்கிய காரணமாக அமைந்துள்ளதாக தெரிவிக்கப்பட்டுள்ளது.
மேலும், இம்ரான் கானின் மூன்று சகோதரிகளையும் விடுதலை செய்ய வேண்டும் எனவும் தெஹ்ரீக்-இ-இன்சாஃப் கட்சி கோரிக்கை விடுத்துள்ளது. கடந்த மாதம் அவர்கள் கைது செய்யப்பட்டதைத் தொடர்ந்து அரசாங்கத்துக்கும் கட்சிக்கும் இடையிலான பதற்றம் மேலும் அதிகரித்ததாக தெரிவிக்கப்பட்டுள்ளது.
சிங்கப்பூர் தேசிய பல்கலைக்கழகத்தின் ஆய்வாளர் ஜேம்ஸ் டோர்சி, இம்ரான் கான் ஒரு மக்கள் ஆதரவு கொண்ட அரசியல் தலைவராக இருப்பதாகவும், அவருக்கு பரந்தளவிலான மக்கள் ஆதரவு இருப்பதாகவும் தெரிவித்துள்ளார்.
இதன் காரணமாகவே போராட்டக்காரர்கள் இஸ்லாமாபாத்துக்குள் நுழைவதைத் தடுப்பதில் அரசாங்கம் உறுதியாக இருப்பதாக அவர் AFP செய்தி நிறுவனத்திடம் தெரிவித்துள்ளார்.
2026 பெப்ரவரி மாதம் ஆப்கானிஸ்தானுடன் ஏற்பட்ட மோதல் உள்ளிட்ட பாகிஸ்தானின் பாதுகாப்புச் சவால்களுக்கு மத்தியில், இந்தப் போராட்டம் மேலும் தீவிரமடைவதை இஸ்லாமாபாத் தவிர்க்க முயற்சிப்பதாகவும் அவர் குறிப்பிட்டுள்ளார்.
இந்நிலையில், தற்போதைய போராட்டம் அரசாங்கத்துக்கு ஒரு சவாலாக இருந்தாலும், அது நாட்டின் இருப்புக்கே அச்சுறுத்தலாக அமையும் நிலை இல்லை எனவும் ஜேம்ஸ் டோர்சி தெரிவித்துள்ளார்.
