இலங்கை தேசிய கிரிக்கெட் அணிக்கான வீரர்கள் தெரிவு, அவர்களின் இன அல்லது பிராந்தியப் பின்னணியை அடிப்படையாகக் கொண்டதல்ல என்றும், வீரர்களின் திறமை மற்றும் விளையாட்டுத் திறன்களின் அடிப்படையிலேயே இடம்பெறுவதாகவும் விளையாட்டுத்துறை அமைச்சர் சுனில் குமார கமகே தெரிவித்துள்ளார்.
நாடாளுமன்றத்தில் எழுப்பப்பட்ட கேள்வியொன்றுக்குப் பதிலளிக்கும்போதே அமைச்சர் இதனைக் குறிப்பிட்டுள்ளார். தேசிய கிரிக்கெட் அணிக்கான வீரர்களைத் தெரிவு செய்யும் பொறுப்பு சுயாதீனமான கிரிக்கெட் தெரிவுக்குழுவிடம் ஒப்படைக்கப்பட்டுள்ளதாகவும் அவர் தெரிவித்துள்ளார்.
இலங்கை கிரிக்கெட் வீரர்களான மிலான் ரத்நாயக்க மற்றும் விஜயகாந்த் வியாஸ்காந்த் ஆகியோரின் திறமைகள் வெளிப்படுத்தப்பட்ட போதிலும், அவர்களுக்குப் போதிய வாய்ப்புகள் வழங்கப்படாமை தொடர்பில் நாடாளுமன்ற உறுப்பினர் ஒருவர் கேள்வி எழுப்பியிருந்தார். அத்துடன், தற்போது பாகிஸ்தானுக்குச் சுற்றுப்பயணம் மேற்கொண்டுள்ள இலங்கை அணியில் மேல் மாகாணம் மற்றும் தென் மாகாணத்தைச் சேர்ந்த வீரர்கள் அதிகளவில் இடம்பெற்றுள்ளதாகவும் அவர் சுட்டிக்காட்டியிருந்தார்.
குறிப்பிட்ட சில பிராந்தியங்களைச் சேர்ந்த வீரர்களுக்கு அதிக வாய்ப்புகள் வழங்கப்படுவதாகத் தோன்றும் நிலையில், ஏனைய பிராந்தியங்களைச் சேர்ந்த திறமையான வீரர்களுக்கும் நியாயமான வாய்ப்புகள் கிடைப்பதை உறுதிப்படுத்த விளையாட்டுத்துறை அமைச்சு தலையிடுமா என்றும் அவர் கேள்வி எழுப்பியிருந்தார்.
இதற்குப் பதிலளித்த அமைச்சர் சுனில் குமார கமகே, வீரர்களைத் தெரிவு செய்யும்போது தெரிவுக்குழு பல்வேறு காரணிகளைக் கருத்தில் கொள்வதாகவும், இன அல்லது புவியியல் பின்னணியைத் தெரிவுக்கான அளவுகோலாகப் பயன்படுத்துவதில்லை என்றும் தெரிவித்தார். “வீரர்களைத் தெரிவு செய்யும்போது தெரிவுக்குழு அவர்களின் இன அல்லது பிராந்தியப் பின்னணியைக் கருத்தில் கொள்வதாக நான் நினைக்கவில்லை. வீரர்களின் திறமைகளையே அவர்கள் கருத்தில் கொள்கின்றனர்” எனவும் அமைச்சர் குறிப்பிட்டுள்ளார்.
மேலும், மிலான் ரத்நாயக்க மற்றும் விஜயகாந்த் வியாஸ்காந்த் ஆகியோரின் வாய்ப்புகள் தொடர்பாக முன்வைக்கப்பட்டுள்ள கவலைகளை கிரிக்கெட் தெரிவுக்குழுவின் கவனத்துக்குக் கொண்டுசென்று, அவர்களின் திறமைகளையும் விளையாட்டுச் செயல்திறனையும் கருத்தில் கொள்ளுமாறு கோர முடியும் எனவும் அமைச்சர் தெரிவித்துள்ளார்.
இலங்கை கிரிக்கெட் தெரிவுக்குழுவின் தலைவராக முன்னாள் கிரிக்கெட் வீரர் கபில விஜேகுணவர்தன செயற்படுகின்றார். அவர் 2026 மே மாதம் குறித்த பதவிக்கு நியமிக்கப்பட்டார்.
