இலங்கையின் முன்னாள் ஜனாதிபதி மஹிந்த ராஜபக்ஷவின் வாழ்க்கை மற்றும் அரசியல் பயணத்தை மையமாகக் கொண்ட பிரமாண்ட வாழ்க்கை வரலாற்றுத் திரைப்படமொன்றை உருவாக்குவதற்கான ஏற்பாடுகள் முன்னெடுக்கப்பட்டு வருவதாகத் தகவல்கள் வெளியாகியுள்ளன. இதன் படப்பிடிப்பை எதிர்வரும் சில நாட்களில் ஆரம்பிப்பதற்குத் திட்டமிடப்பட்டுள்ளதாகவும் தெரிவிக்கப்படுகிறது.
மஹிந்த ராஜபக்ஷவின் ஆரம்பகால வாழ்க்கை, மாத்தமுலானையில் இருந்து தேசிய அரசியலில் உயர்ந்த நிலையை அடைந்த பயணம், அவரது ஜனாதிபதி பதவிக்காலத்தை வரையறுத்த முக்கிய சம்பவங்கள் உள்ளிட்டவற்றை இத்திரைப்படம் ஆராயவுள்ளதாகக் கூறப்படுகிறது.
இலங்கையின் மூன்று தசாப்தகால உள்நாட்டுப் போரின் இறுதிக்கட்டம், அத்துடன் மஹிந்த ராஜபக்ஷவின் அரசியல் பயணத்தை வடிவமைத்த உள்நாட்டு மற்றும் சர்வதேச சவால்கள் ஆகியவையும் திரைப்படத்தின் திரைக்கதையில் இடம்பெறவுள்ளதாகத் தகவல்கள் தெரிவிக்கின்றன.
இலங்கையின் வாழ்க்கை வரலாற்றுத் திரைப்படத் துறையில் முக்கியமான தயாரிப்பாக இதனை முன்னெடுக்கத் திட்டமிடப்பட்டுள்ளதாகக் கூறப்படும் நிலையில், தயாரிப்புக் குழுவினர் தொடர்பான விபரங்கள் இதுவரை பகிரங்கமாக அறிவிக்கப்படவில்லை.
இலங்கையின் விளம்பரத் துறையில் அனுபவமும் நற்பெயரும் கொண்ட திரைப்பட இயக்குநர் ஒருவர் இத்திரைப்படத்தை இயக்கவுள்ளதாகத் தெரிவிக்கப்படுகிறது. குறிப்பிடத்தக்க நிதி முதலீட்டுடன், நவீன திரைப்படத் தொழில்நுட்பங்களைப் பயன்படுத்தி தயாரிப்பை முன்னெடுக்கவும், உள்நாட்டுத் திரையுலகைத் தாண்டி சர்வதேச சந்தையிலும் திரைப்படத்தை அறிமுகப்படுத்தவும் திட்டமிடப்பட்டுள்ளதாகக் கூறப்படுகிறது.
சர்வதேச திரைப்பட விழாக்களில் பங்கேற்பதற்கும் வெளிநாடுகளில் திரைப்படத்தை விநியோகிப்பதற்குமான வாய்ப்புகள் குறித்தும் தயாரிப்பாளர்கள் ஆராய்ந்து வருவதாகத் தகவல்கள் தெரிவிக்கின்றன. எனினும், இயக்குநரின் பெயர், தயாரிப்புச் செலவு, நிதி ஏற்பாடுகள் மற்றும் சர்வதேச விநியோகத் திட்டங்கள் தொடர்பான விபரங்கள் இதுவரை உறுதிப்படுத்தப்படவில்லை.
இத்திரைப்படத்தில் மஹிந்த ராஜபக்ஷவாக நடிக்கவுள்ள நடிகர் யார் என்பது குறித்தும் எதிர்பார்ப்பு நிலவுகிறது. முன்னணி நடிகர்கள் மற்றும் வளர்ந்து வரும் நடிகர்கள் சிலர் பிரதான மற்றும் துணைக் கதாபாத்திரங்களுக்காகப் பரிசீலிக்கப்படுவதாகக் கூறப்படுகிறது. இருப்பினும், நடிகர்கள் தெரிவு குறித்த நடவடிக்கைகள் இரகசியமாக முன்னெடுக்கப்படுவதாகவும், இதுவரை உத்தியோகபூர்வ அறிவிப்பு எதுவும் வெளியாகவில்லை என்றும் தெரிவிக்கப்படுகிறது.
மஹிந்த ராஜபக்ஷவின் அரசியல் பயணத்தை மையமாகக் கொண்ட இத்திரைப்படம், இலங்கையின் அரசியல் வரலாற்றில் தொடர்ந்து விவாதிக்கப்படும் ஒரு காலகட்டத்தை மீண்டும் திரையில் கொண்டுவரும் என எதிர்பார்க்கப்படுகிறது. குறிப்பாக, 2009ஆம் ஆண்டு தமிழீழ விடுதலைப் புலிகள் அமைப்பு உடனான இறுதிப்போர் அக்காலப்பகுதியில் இடம்பெற்ற உள்நாட்டு அரசியல் மாற்றங்கள் மற்றும் சர்வதேச ரீதியில் எழுந்த விமர்சனங்கள் உள்ளிட்ட விடயங்கள் திரைப்படத்தில் எவ்வாறு சித்தரிக்கப்படுகின்றன என்பது முக்கியமானதாக அமையும்.
அரசியல் செல்வாக்குகளுக்கு அப்பால் கலை மற்றும் வரலாற்று அம்சங்களுக்கு முக்கியத்துவம் அளிக்கும் படைப்பாக இதனை உருவாக்குவதே நோக்கம் எனத் தகவல்கள் தெரிவிக்கின்றன. இருப்பினும், அந்த நோக்கம் எந்தளவுக்கு நடைமுறைப்படுத்தப்படும் என்பது திரைக்கதை, இயக்கம் மற்றும் இறுதிப் படைப்பின் உள்ளடக்கத்தைப் பொறுத்தே அமையும்.
தற்போதைக்கு இயக்குநர், நடிகர்கள், தயாரிப்புச் செலவு மற்றும் வெளியீட்டுத் திகதி உள்ளிட்ட முக்கிய விபரங்கள் உறுதிப்படுத்தப்படவில்லை. திரைப்படத் தயாரிப்புக் குழுவின் உத்தியோகபூர்வ அறிவிப்பின் பின்னரே, இந்தத் திட்டம் தொடர்பான மேலதிக விபரங்களைத் தெளிவாக அறிந்துகொள்ள முடியும்.
