நாட்டில் சுமார் 6 இலட்சத்து 78 ஆயிரம் சாரதி அனுமதிப்பத்திரங்கள் தற்போது அச்சிடப்படாமல் நிலுவையில் உள்ளதாக மோட்டார் போக்குவரத்து திணைக்கள அதிகாரிகள் தெரிவித்துள்ளனர்.
உள்கட்டமைப்பு மற்றும் மூலோபாய அபிவிருத்தி தொடர்பான துறைசார் மேற்பார்வைக் குழுவின் முன்னிலையில் அதிகாரிகள் இந்தத் தகவலை வெளியிட்டுள்ளனர்.
தற்போது நாளொன்றுக்கு சுமார் 4,600 சாரதி அனுமதிப்பத்திரங்களை மட்டுமே அச்சிடக்கூடிய நிலை காணப்படுவதால், நிலுவையில் உள்ள அனுமதிப்பத்திரங்களின் எண்ணிக்கை தொடர்ந்து அதிகரித்து வருவதாக அவர்கள் தெரிவித்துள்ளனர்.
இந்த தாமதத்தைத் தீர்ப்பதற்காக, எதிர்வரும் ஒக்டோபர் 15ஆம் திகதிக்குள் மேலும் இரண்டு அச்சிடும் இயந்திரங்களை நிறுவ நடவடிக்கை எடுக்கப்பட்டுள்ளதாக அதிகாரிகள் தெரிவித்துள்ளனர். இதன் மூலம் நாளொன்றுக்கு சுமார் 8,200 சாரதி அனுமதிப்பத்திரங்களை அச்சிடக்கூடிய திறன் ஏற்படும் என எதிர்பார்க்கப்படுகிறது.
நாடாளுமன்ற உறுப்பினர் எஸ்.எம். மரிக்கார் தலைமையிலான குழு, சாரதி அனுமதிப்பத்திரங்கள் மற்றும் வாகன இலக்கத் தகடுகளை வழங்குவதில் ஏற்பட்டுள்ள தாமதங்கள் தொடர்பில் முறையான விசாரணை நடத்தவும் உத்தரவிட்டுள்ளது.
தாமதம் எவ்வாறு ஏற்பட்டது, அதற்கான நிர்வாக மற்றும் தொழில்நுட்ப காரணிகள், அத்துடன் தொடர்புடைய கேள்விப்பத்திரம் மற்றும் கொள்முதல் நடைமுறைகள் குறித்து விரிவான அறிக்கையை 45 நாட்களுக்குள் சமர்ப்பிக்குமாறு அதிகாரிகளுக்கு அறிவுறுத்தப்பட்டுள்ளது.
இதேவேளை, 2026 மார்ச் 10ஆம் திகதிக்குப் பின்னர் பதிவு செய்யப்பட்ட வாகனங்களுக்கான இலக்கத் தகடுகள் தற்போது 14 நாட்களுக்குள் வழங்கப்பட்டு வருவதாக அதிகாரிகள் தெரிவித்துள்ளனர்.
மோட்டார் போக்குவரத்து திணைக்களத்தின் உபகரணங்கள் மற்றும் தொழில்நுட்ப வசதிகளை மேம்படுத்துவதுடன், எதிர்காலத்தில் அரச சேவைகளில் இதுபோன்ற தாமதங்கள் ஏற்படுவதைத் தடுப்பதற்கான நடவடிக்கைகளை மேற்கொள்ள வேண்டியதன் அவசியத்தையும் குழு வலியுறுத்தியுள்ளது.
