உயிர்த்த ஞாயிறு தாக்குதல் : குற்றவாளிகளாகத் தண்டிக்கப்பட்ட மூவரிடம் விசாரணை நடத்த சி.ஐ.டி.க்கு அனுமதி

உயிர்த்த ஞாயிறு பயங்கரவாதத் தாக்குதல்களுடன் தொடர்புடைய வழக்கில் மூன்று நீதிபதிகள் கொண்ட மேல் நீதிமன்ற அமர்வினால் குற்றவாளிகளாகத் தீர்ப்பளிக்கப்பட்ட மூவர், உண்மையான குற்றவாளிகள் இன்னமும் சுதந்திரமாக இருப்பதாகத் தெரிவித்துள்ள கருத்துகள் தொடர்பில் குற்றப் புலனாய்வுத் திணைக்களம் (CID) விசாரணைகளை ஆரம்பித்துள்ளது.

குறித்த மூவரும் தமக்கு எதிரான வழக்கில் தண்டனை விதிக்கப்பட்டுள்ள நிலையில், தாக்குதல்களுக்குப் பொறுப்பானவர்கள் இன்னமும் சுதந்திரமாக இருப்பதாகத் தெரிவித்துள்ளதாக மேலதிக சொலிசிட்டர் ஜெனரல் திலீப பீரிஸ், நேற்று புதன்கிழமை கோட்டை நீதவான் நீதிமன்றத்தில் அறிவித்தார்.

தாம் சிறைக்கு அனுப்பப்படுகின்ற போதிலும், உண்மையில் தாக்குதல்களுடன் தொடர்புடையவர்கள் சுதந்திரமாக இருப்பதாக அவர்கள் தெரிவித்துள்ளனர். இந்தக் கருத்துகள் பாரதூரமானவை எனச் சுட்டிக்காட்டிய மேலதிக சொலிசிட்டர் ஜெனரல், மில்ஹான், ரிஸ்கான் மற்றும் ஸைனுல் ஆப்தீன் என அடையாளம் காணப்பட்ட மூவரிடமும் சிறைக்குச் சென்று வாக்குமூலங்களைப் பதிவு செய்வதற்கு எட்டு சி.ஐ.டி. அதிகாரிகளுக்கு அனுமதி வழங்குமாறு நீதிமன்றத்திடம் கோரிக்கை விடுத்தார்.

உயிர்த்த ஞாயிறு தாக்குதல் விசாரணைகளைத் திசைதிருப்பியதாகக் கூறப்படும் குற்றச்சாட்டில், அரச புலனாய்வுச் சேவையின் முன்னாள் பணிப்பாளரும் ஓய்வுபெற்ற மேஜர் ஜெனரலுமான சுரேஷ் சல்லே உள்ளிட்ட மூவருக்கு எதிரான வழக்கு, கோட்டை நீதவான் பசன் அமரசேன முன்னிலையில் விசாரணைக்கு எடுத்துக்கொள்ளப்பட்டபோதே இந்த விடயங்கள் முன்வைக்கப்பட்டன.

விசாரணைகள் துரிதப்படுத்தப்பட்டுள்ளதாக நீதிமன்றில் அறிவிப்பு

முன்னதாக மந்தகதியில் இடம்பெற்று வந்த விசாரணைகள் தற்போது துரிதமாக முன்னெடுக்கப்பட்டு வருவதாக மேலதிக சொலிசிட்டர் ஜெனரல் திலீப பீரிஸ் நீதிமன்றத்தில் தெரிவித்தார்.

கடந்த வாரத்தில் பல முக்கிய சாட்சிகளிடம் வாக்குமூலங்கள் பதிவு செய்யப்பட்டுள்ளதாகவும் அவர் குறிப்பிட்டார். இராணுவப் புலனாய்வுப் பிரிவுக்குத் தகவல்களை வழங்கிய மைக்கல் சேவியர் வில்வராசிங்கம் எனப்படும் ராஜன் என்பவரிடமிருந்தும் வாக்குமூலம் பெறப்பட்டுள்ளதாகத் தெரிவிக்கப்பட்டது.

ராஜன், சுரங்க என அடையாளம் காணப்பட்ட இராணுவக் கோப்ரல் ஒருவருடன் தொடர்பில் இருந்ததாகவும், தீபன் என்பவரின் வீட்டில் இடம்பெறும் நடவடிக்கைகள் தொடர்பில் தகவல்களைச் சேகரிக்குமாறு இராணுவத்தினரால் அவருக்கு அறிவுறுத்தப்பட்டதாகவும் நீதிமன்றத்தில் தெரிவிக்கப்பட்டது.

தீபன் என்பவர், உயிர்த்த ஞாயிறு தற்கொலைக் குண்டுதாரியான இன்ஷாப் அஹமட்டின் மாமனாரும் வர்த்தகருமான அலாவுதீனின் நண்பராக அடையாளம் காணப்பட்டுள்ளார்.

உயிர்த்த ஞாயிறு தாக்குதல்களுக்கு முன்னர் குறித்த வீட்டுக்குச் சென்ற ராஜன், அங்கு கறுப்பு நிற புர்கா அணிந்த பெண்ணொருவரையும் மட்டக்களப்பு பிரதேசத்துக்குரிய பேச்சுவழக்கில் தமிழ் பேசிக்கொண்டிருந்த மற்றுமொரு நபரையும் அவதானித்ததாகத் தெரிவிக்கப்பட்டது.

இந்தத் தகவல்களை ராஜன், கோப்ரல் சுரங்கவிடம் தெரிவித்திருந்ததாகவும் நீதிமன்றத்தில் கூறப்பட்டது.

உயிர்த்த ஞாயிறு தாக்குதல்களுக்குப் பின்னர் தொலைக்காட்சிச் செய்திகளைப் பார்த்த ராஜன், அந்த வீட்டில் கண்ட பெண்ணை சாரா ஜாஸ்மின் என அடையாளம் கண்டதாகவும் தெரிவிக்கப்பட்டது.

எனினும், இதனைச் சுரங்கவிடம் தெரிவித்தபோது, அமைதியாக இருக்குமாறும், அந்தத் தகவலைப் புறக்கணித்து சம்பவத்தை மறந்துவிடுமாறும் அவருக்கு அறிவுறுத்தப்பட்டதாக மேலதிக சொலிசிட்டர் ஜெனரல் நீதிமன்றத்தில் தெரிவித்தார்.

இந்தத் தகவல்கள் வெளிவருவதை சுரேஷ் சல்லேயின் தலையீட்டுடன் தடுக்க நடவடிக்கை எடுக்கப்பட்டதாகவும் அவர் குற்றஞ்சாட்டினார்.

கருணா அம்மானுக்கு போலி இராஜதந்திரக் கடவுச்சீட்டு?

முன்னாள் விடுதலைப் புலிகள் அமைப்பின் உறுப்பினரான கருணா அம்மான், பிரித்தானியாவுக்குச் செல்வதற்காக போலியான இராஜதந்திரக் கடவுச்சீட்டு ஒன்றைப் பெற்றுக்கொடுக்கப்பட்டதாகக் கூறப்படும் குற்றச்சாட்டு தொடர்பிலும் விசாரணைகள் இடம்பெற்று வருவதாக நீதிமன்றத்தில் தெரிவிக்கப்பட்டது.

சுரேஷ் சல்லே மற்றும் இராணுவத்துடன் தொடர்புடைய அன்சார் என அடையாளம் காணப்பட்ட மற்றுமொரு நபர் இணைந்து குறித்த கடவுச்சீட்டை ஏற்பாடு செய்ததாகக் கருணா அம்மான் தெரிவித்திருந்ததாக மேலதிக சொலிசிட்டர் ஜெனரல் குறிப்பிட்டார்.

சுற்றாடல் அமைச்சின் செயலாளர் எனக் குறிப்பிடப்பட்ட கோகில துஷ்மந்த என்ற பெயரில் அந்தக் கடவுச்சீட்டு வழங்கப்பட்டதாகவும், எனினும் அத்தகைய நபர் ஒருவர் இருப்பதற்கான ஆதாரங்கள் இல்லை என விசாரணையாளர்கள் தெரிவித்துள்ளதாகவும் நீதிமன்றத்தில் கூறப்பட்டது.

பின்னர் கருணா அம்மான் பிரித்தானியாவில் கைது செய்யப்பட்டு சிறையில் அடைக்கப்பட்டதுடன், அதன் பின்னர் இலங்கைக்குத் திருப்பி அனுப்பப்பட்டதாகவும் தெரிவிக்கப்பட்டது.

சுரேஷ் சல்லேவிடம் பல கடவுச்சீட்டுகள் இருப்பதாகவும், இது தொடர்பான மேலதிக விசாரணைகள் வெளிவிவகார அமைச்சின் ஊடாக முன்னெடுக்கப்படும் என்றும் மேலதிக சொலிசிட்டர் ஜெனரல் நீதிமன்றத்தில் குறிப்பிட்டார்.

இதற்கிடையில், உயிர்த்த ஞாயிறு தாக்குதல் விசாரணையில் முக்கிய சாட்சியாகக் கருதப்படும் ஆசாத் மௌலானாவை கருணா மற்றும் பிள்ளையான் தரப்பினருக்கு அறிமுகப்படுத்தியதாகக் கிடைத்த தகவலின் அடிப்படையில், முன்னாள் அமைச்சர் டக்ளஸ் தேவானந்தாவிடமும் சி.ஐ.டி. அதிகாரிகள் வாக்குமூலம் பதிவு செய்துள்ளனர்.

சுரேஷ் சல்லே மீதான குற்றச்சாட்டுகளை மறுத்த தரப்பு

சுரேஷ் சல்லே சார்பில் மன்றில் முன்னிலையான ஜனாதிபதி சட்டத்தரணி ஷவீந்திர பெர்னாண்டோ, தனது கட்சிக்காரருக்கு எதிராகப் போதுமான ஆதாரங்களை அரச தரப்பு முன்வைக்கத் தவறியுள்ளதாகத் தெரிவித்தார்.

இந்த வழக்கு முழுமையாக வாக்குமூலங்களை அடிப்படையாகக் கொண்டுள்ளதாகக் குறிப்பிட்ட அவர், பல கடவுச்சீட்டுகளைச் சுரேஷ் சல்லே வைத்திருந்ததாகக் கூறப்படும் குற்றச்சாட்டையும் கேள்விக்குட்படுத்தினார்.

குறித்த கடவுச்சீட்டுகளின் இலக்கங்கள் மற்றும் அவை எவ்வாறு பெற்றுக்கொள்ளப்பட்டதாகக் கூறப்படுகின்றன என்பது தொடர்பான விபரங்களை விசாரணையாளர்கள் வெளிப்படுத்த வேண்டும் என்றும் அவர் வலியுறுத்தினார்.

கருணா அம்மானுக்கான கடவுச்சீட்டு தயாரிக்கப்பட்டதாகக் கூறப்படும் காலப்பகுதியில் சுரேஷ் சல்லே பிரான்ஸில் இருந்ததாகவும், வெளிநாட்டில் இருந்துகொண்டு இலங்கையில் அந்தக் கடவுச்சீட்டை எவ்வாறு ஏற்பாடு செய்திருக்க முடியும் என்றும் அவர் கேள்வி எழுப்பினார்.

கோட்டாபய ராஜபக்ஷவின் வெளிநாட்டுப் பயணம் குறித்தும் ஆராய்வு

இந்த வழக்குடன் தொடர்பாக வெளிநாட்டுப் பயணத் தடை விதிக்கப்பட்டுள்ள முன்னாள் ஜனாதிபதி கோட்டாபய ராஜபக்ஷ தொடர்பான விசாரணைகளின் முன்னேற்றம் குறித்தும் நீதவான் பசன் அமரசேன கேள்வி எழுப்பினார். எனினும், அவர் இதுவரை சந்தேகநபராகப் பெயரிடப்படவில்லை.

மருத்துவ சிகிச்சைக்காக வெளிநாடு செல்வதற்கு அனுமதி வழங்கி, தனக்கு விதிக்கப்பட்டுள்ள பயணத் தடையை நீக்குமாறு கோரி முன்னாள் ஜனாதிபதி சார்பில் தாக்கல் செய்யப்பட்ட மனு குறித்தும் நீதவான் கவனம் செலுத்தினார்.

இதற்குப் பதிலளித்த மேலதிக சொலிசிட்டர் ஜெனரல் திலீப பீரிஸ், கோட்டாபய ராஜபக்ஷ தொடர்பான விசாரணைகள் முன்னேறிய கட்டத்தில் இருப்பதாகத் தெரிவித்தார்.

ஏனைய சந்தேகநபர்கள் தொடர்பான விசாரணைகள் தொடர்வதாலும், முன்னாள் ஜனாதிபதி தாக்கல் செய்த வழக்கொன்று மேன்முறையீட்டு நீதிமன்றத்தில் நிலுவையில் இருப்பதாலும் அவர் இதுவரை சந்தேகநபராகப் பெயரிடப்படவில்லை என்றும் விளக்கமளித்தார்.

சிங்கப்பூரின் மவுண்ட் எலிசபெத் வைத்தியசாலையில் இதய அறுவைச் சிகிச்சை செய்துகொண்டதைத் தொடர்ந்து, மேலதிக மருத்துவப் பரிசோதனைகள் மற்றும் சிகிச்சைகளுக்காக நவம்பர் மாத நடுப்பகுதி வரை இரண்டு வாரங்கள் வெளிநாடு செல்ல கோட்டாபய ராஜபக்ஷ அனுமதி கோரியுள்ளதாகவும் நீதிமன்றத்தில் தெரிவிக்கப்பட்டது.

முன்னாள் ஜனாதிபதிக்கு வெளிநாட்டில் மருத்துவ சிகிச்சை அவசியமாக இருந்தால், மனிதாபிமான அடிப்படையில் அதற்கான அனுமதியை வழங்க முடியும் என்றும் மேலதிக சொலிசிட்டர் ஜெனரல் குறிப்பிட்டார்.

சுரேஷ் சல்லேயின் உடல்நிலை குறித்து நீதவான் விசாரணை

இதற்கிடையில், சி.ஐ.டி. காவலில் வைக்கப்பட்டுள்ள சுரேஷ் சல்லேயை அண்மையில் நேரில் சந்தித்ததாக நீதவான் தெரிவித்தார். சி.ஐ.டி. அதிகாரிகள் தன்னை நன்றாக நடத்துவதாகச் சல்லே தன்னிடம் கூறியதாகவும் அவர் குறிப்பிட்டார்.

சல்லே கோரியிருந்த சில உணவுப் பொருட்கள் வழங்கப்பட்டுள்ளனவா என நீதவான் வினவியபோது, அதற்கான ஏற்பாடுகள் செய்யப்பட்டுள்ளதாக சி.ஐ.டி. அதிகாரிகள் தெரிவித்தனர்.

சல்லே சார்பில் முன்னிலையான சட்டத்தரணி அசித் சிறிவர்தன, தனது கட்சிக்காரரை வெலிசறை சிறைச்சாலைக்கு மாற்றுவதைவிட சி.ஐ.டி. காவலில் வைத்திருப்பது சிறந்தது எனத் தெரிவித்தார். மேலும், சல்லேவுக்கு மருத்துவமனையில் அனுமதி தேவைப்பட்டபோது விரைவாக மருத்துவ வசதிகளை ஏற்படுத்திக் கொடுத்தமைக்காக மேலதிக சொலிசிட்டர் ஜெனரலுக்கும் அவர் நன்றி தெரிவித்தார்.

121 நாட்கள் மருத்துவமனையில் அனுமதிக்கப்பட்டிருந்த சுரேஷ் சல்லே, தற்போது சி.ஐ.டி. காவலில் இருக்கும்போது சிறந்த உடல்நிலையில் இருப்பதாக மேலதிக சொலிசிட்டர் ஜெனரல் நீதிமன்றத்தில் தெரிவித்தார்.

இருதரப்பு சமர்ப்பணங்களையும் ஆராய்ந்த கோட்டை நீதவான் பசன் அமரசேன, அரச தரப்பு கோரிக்கைகளுக்கு அனுமதி வழங்கியதுடன், விசாரணைகளின் முன்னேற்றத்தை அறிவிப்பதற்காக வழக்கை எதிர்வரும் நவம்பர் 25ஆம் திகதிக்கு ஒத்திவைத்தார்.