தனியார் பேருந்து உரிமையாளர் ஒருவரிடம் இருந்து 20,000 ரூபா இலஞ்சம் கோரிப் பெற்ற குற்றச்சாட்டில், தேசிய போக்குவரத்து ஆணைக்குழுவின் (NTC) முன்னாள் நடமாடும் பரிசோதகருக்கு 16 ஆண்டுகள் கடூழிய சிறைத்தண்டனை விதிக்கப்பட்டுள்ளது.
கொழும்பு மேல் நீதிமன்ற நீதிபதி இந்தத் தீர்ப்பை வழங்கியுள்ளார். இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்குழுவினால் (CIABOC) தாக்கல் செய்யப்பட்ட நான்கு குற்றச்சாட்டுகளிலும் சந்தேகநபர் குற்றவாளியாகக் காணப்பட்டுள்ளார்.
எனினும், நான்கு குற்றச்சாட்டுகளுக்காகவும் விதிக்கப்பட்ட சிறைத்தண்டனைகளை ஒரே நேரத்தில் அனுபவிக்குமாறு நீதிமன்றம் உத்தரவிட்டுள்ளது. இதன்படி, அவர் நடைமுறையில் நான்கு ஆண்டுகள் சிறைத்தண்டனையை அனுபவிக்க வேண்டியிருக்கும்.
அத்துடன், 20,000 ரூபா அபராதமும் விதிக்கப்பட்டுள்ளது. குறித்த அபராதத்தைச் செலுத்தத் தவறினால், மேலும் எட்டு மாதங்கள் சிறைத்தண்டனை அனுபவிக்க நேரிடும் என நீதிமன்றம் உத்தரவிட்டுள்ளது.
2015ஆம் ஆண்டு இடம்பெற்ற சம்பவம்
2015 மார்ச் 18ஆம் திகதியளவில், கொழும்புக்கும் பிபிலைக்கும் இடையில் சேவையில் ஈடுபட்டிருந்த அரைச் சொகுசு தனியார் பேருந்து தொடர்பாக இந்த வழக்கு தொடரப்பட்டுள்ளது.
வழக்கமான சோதனை நடவடிக்கையின்போது, பேருந்தில் அனுமதிக்கப்பட்ட எண்ணிக்கையை விட 13 பயணிகள் அதிகமாகப் பயணித்தமை கண்டறியப்பட்டது. அவர்களில் பலர் நின்றுகொண்டு பயணித்துள்ளதாகவும் தெரிவிக்கப்பட்டுள்ளது.
இதனையடுத்து, குறித்த பேருந்தின் வழித்தட அனுமதிப்பத்திரத்தை அதிகாரிகள் கைப்பற்றினர்.
வழக்கு விசாரணையின்போது முன்வைக்கப்பட்ட சாட்சியங்களின்படி, தேசிய போக்குவரத்து ஆணைக்குழுவின் நாரஹேன்பிட்டிய தலைமை அலுவலகத்தில் பணியாற்றிய சந்தேகநபர், பேருந்து உரிமையாளரைத் தொடர்புகொண்டு, விதிமீறல் தொடர்பில் சட்ட நடவடிக்கை எடுக்காமல் இருப்பதற்காக 20,000 ரூபாவைக் கோரியுள்ளார்.
குறித்த பணம், குற்றஞ்சாட்டப்பட்டவருடன் பணியாற்றிய மற்றொரு நடமாடும் பரிசோதகரின் வங்கிக் கணக்கில் பின்னர் வைப்புச் செய்யப்பட்டதாக நீதிமன்றத்தில் தெரிவிக்கப்பட்டது.
நீண்டகாலமாக இடம்பெற்ற வழக்கு விசாரணையின் முடிவில், முன்வைக்கப்பட்ட நான்கு குற்றச்சாட்டுகளையும் நியாயமான சந்தேகங்களுக்கு அப்பால் அரசுத் தரப்பு நிரூபித்துள்ளதாக நீதிபதி தீர்மானித்தார்.
இதனையடுத்து, குற்றவாளிக்கு மேற்படி சிறைத்தண்டனைகளையும் அபராதத்தையும் விதித்து நீதிமன்றம் தீர்ப்பளித்துள்ளது.
