நெல்சன் திலீப்குமார் இயக்கத்தில் நடிகர் ரஜினிகாந்த் நடிப்பில் பிரம்மாண்டமாக உருவாகி வரும் ‘ஜெயிலர் 2’ திரைப்படத்தின் வெளியீட்டுத் தேதி குறித்த புதிய தகவல் வெளியாகியுள்ளது.
கடந்த 2023-ஆம் ஆண்டு வெளியான ‘ஜெயிலர்’ படத்தின் முதல் பாகம் ரசிகர்களிடையே பெரும் வரவேற்பைப் பெற்று, ரூ.600 கோடிக்கும் மேல் வசூல் சாதனை படைத்தது. அதனைத் தொடர்ந்து, தற்போது இப்படத்தின் இரண்டாம் பாகம் விறுவிறுப்பாக உருவாகி வருகிறது.
இம்முறை ரஜினியுடன் இணைந்து பாலகிருஷ்ணா, சந்தானம், சுராஜ் வெஞ்சரமுடு, யோகிபாபு உள்ளிட்ட பல முன்னணி நட்சத்திரங்கள் நடித்துள்ளனர். படத்தின் படப்பிடிப்பு முழுமையாக நிறைவடைந்ததைத் தொடர்ந்து, தற்போது போஸ்ட் புரொடக்ஷன் (Post-production) பணிகள் தீவிரமாக நடைபெற்று வருகின்றன.
வெளியீட்டுத் திட்டம்
இத்திரைப்படம் முதலில் வரும் செப்டம்பர் மாதம் திரைக்கு வரும் என்று கூறப்பட்டது. ஆனால், தற்போதைய புதிய தகவல்களின்படி, தீபாவளிப் பண்டிகையை முன்னிட்டு நவம்பர் 8-ஆம் திகதி படத்தை ரிலீஸ் செய்யப் படக்குழு திட்டமிட்டு வருவதாகத் தெரிகிறது. இதுகுறித்த அதிகாரப்பூர்வ அறிவிப்பு விரைவில் வெளியாகும் என்று எதிர்பார்க்கப்படுகிறது.
அடுத்தடுத்தப் ப்ராஜெக்ட்கள்
‘ஜெயிலர் 2’ திரைப்படத்தைத் தொடர்ந்து, நடிகர் ரஜினிகாந்த் நடிக்கும் அடுத்த புதிய படத்தை ‘டிராகன்’ பட இயக்குநர் அஸ்வந்த் மாரிமுத்து இயக்க உள்ளதாகத் தகவல்கள் தெரிவிக்கின்றன. இந்தத் திரைப்படத்தை நடிகர் கமல்ஹாசன் தனது ‘ராஜ் கமல் ஃபிலிம்ஸ் இன்டர்நேஷனல்’ நிறுவனம் மூலம் தயாரிக்க உள்ளார் என்பது குறிப்பிடத்தக்கது.
