தமிழ்-முஸ்லிம் மக்களை ஓரங்கட்டும் கருத்துகளை ஏற்க முடியாது – சஜித்துக்கு மனோ கணேசன் கடிதம்

கண்டியில் மகாநாயக்க தேரரைச் சந்தித்தபோது ஐக்கிய மக்கள் சக்தியின் (SJB) சிரேஷ்ட உறுப்பினர் லக்ஷ்மன் கிரியெல்ல தெரிவித்ததாகக் கூறப்படும் கருத்துகள் குறித்து, தமிழ் முற்போக்குக் கூட்டணியின் தலைவர் மனோ கணேசன் கடும் அதிருப்தி வெளியிட்டுள்ளார்.

ஒக்டோபர் 13ஆம் திகதியிடப்பட்டு எதிர்க்கட்சித் தலைவர் சஜித் பிரேமதாசவுக்கு அனுப்பிய கடிதத்தில், கலகொட அத்தே ஞானசார தேரர் தொடர்பான சர்ச்சையை அரசாங்கம் சிங்கள பௌத்த பெரும்பான்மைக்கு அப்பாற்பட்ட தமிழ் பேசும் மக்கள் மற்றும் சமூகங்களைத் திருப்திப்படுத்துவதற்காகப் பயன்படுத்துவதாக லக்ஷ்மன் கிரியெல்ல கூறியதாக முன்வைக்கப்படும் கருத்து தொடர்பில் மனோ கணேசன் கவலை வெளியிட்டுள்ளார்.

தமிழ் மற்றும் முஸ்லிம் சமூகங்களைக் குறிப்பிடுவதற்குப் பழைய, பொருத்தமற்ற சொற்கள் பயன்படுத்தப்பட்டதாகக் கூறப்படும் விடயத்தையும் அவர் விமர்சித்துள்ளார். இவ்வாறான சொற்பிரயோகங்கள் சமூகங்களுக்கிடையிலான பிளவுகளை மேலும் வலுப்படுத்துவதுடன், சக குடிமக்களின் கண்ணியத்தையும் பாதிக்கக்கூடும் என அவர் எச்சரித்துள்ளார். நாட்டின் மூத்த பௌத்த மதத் தலைவர்களுடனான கலந்துரையாடலின்போது இத்தகைய கருத்துகள் தெரிவிக்கப்பட்டதாகக் கூறப்படுவது வருந்தத்தக்கது என்றும் அவர் குறிப்பிட்டுள்ளார்.

ஞானசார தேரர் சிறையில் அடைக்கப்பட்டுள்ள விவகாரம் தொடர்பில் கருத்துத் தெரிவித்த மனோ கணேசன், சட்டத்தின் ஆட்சியை நிலைநாட்ட வேண்டியதன் முக்கியத்துவத்தை வலியுறுத்தியுள்ளார். நீதிமன்றத் தீர்ப்பு தொடர்பில் பலரும் கேள்வி எழுப்பாமல் இருந்ததாகவும் அவர் சுட்டிக்காட்டியுள்ளார். அதேவேளை, முன்னர் வழங்கப்பட்ட ஜனாதிபதி மன்னிப்பில் அடையாளம் காணப்பட்ட சட்டக் குறைபாடுகளைச் சரிசெய்து, சட்டத்திற்கு அமைவாக ஜனாதிபதி அநுர குமார திசாநாயக்க மீண்டும் மன்னிப்பு வழங்கினால் அதற்கு தாம் எதிர்ப்புத் தெரிவிக்கப் போவதில்லை என்றும் அவர் தெரிவித்துள்ளார்.

ஞானசார தேரரின் சிறைச்சாலை ஆடை தொடர்பான சர்ச்சை குறித்துப் பேசிய அவர், நடைமுறையிலுள்ள சிறைச்சாலை விதிமுறைகளை ஆராய்ந்து திருத்தங்களைப் பரிந்துரைப்பதற்காக ஜனாதிபதியால் நியமிக்கப்பட்ட குழுவின் ஊடாகவே இந்த விவகாரம் கையாளப்பட வேண்டும் எனக் குறிப்பிட்டுள்ளார். குறித்த நடைமுறை முன்னெடுக்கப்படும் நிலையில், தமிழ் பேசும் இலங்கையர்கள் இந்த விவகாரம் தொடர்பில் பகிரங்கமாகக் கருத்துத் தெரிவிப்பதைத் தவிர்க்குமாறும் தாம் ஏற்கனவே கோரிக்கை விடுத்துள்ளதாக அவர் கூறியுள்ளார்.

எனினும், ஞானசார தேரரின் சிறைவாசம் அல்லது சிறைச்சாலை ஆடை தொடர்பில் மாறுபட்ட கருத்துகள் இருப்பதை அடிப்படையாகக் கொண்டு தமிழ், முஸ்லிம் மக்களை ஓரங்கட்டும் அல்லது இழிவுபடுத்தும் வகையிலான மொழிப் பிரயோகங்களை நியாயப்படுத்த முடியாது என மனோ கணேசன் வலியுறுத்தியுள்ளார். கடந்த காலங்களில் காணப்பட்ட பிளவுகளை ஏற்படுத்தும் மொழியையும் மனப்பாங்குகளையும் மீண்டும் முன்னெடுப்பதைத் தவிர்த்து, தான் சுட்டிக்காட்டியுள்ள விடயங்களை ஆக்கபூர்வமாகப் பரிசீலிக்குமாறும் அவர் சஜித் பிரேமதாசவிடம் கோரிக்கை விடுத்துள்ளார்.