“சட்டத்திற்கு மேலாக எவரும் இல்லை” என்ற ஜனாதிபதியின் கூற்று உண்மையானால், சுமத்தப்பட்டுள்ள அனைத்து முறைகேடுகள் குறித்தும் பாரபட்சமின்றி விசாரணை நடத்தப்பட வேண்டும் என ஸ்ரீலங்கா பொதுஜன பெரமுனவின் (SLPP) தேசிய அமைப்பாளரும் நாடாளுமன்ற உறுப்பினருமான நாமல் ராஜபக்ஷ தெரிவித்துள்ளார்.
கஸ்பேவ பகுதியில் நேற்று செவ்வாய்க்கிழமை நடைபெற்ற பொதுக்கூட்டம் ஒன்றில் கலந்துகொண்டு உரையாற்றும் போதே அவர் இதனைக் குறிப்பிட்டார்.
சமமான நீதி நிலைநாட்டப்பட வேண்டுமாயின், நிதி மற்றும் நிர்வாக முறைகேடுகளுடன் தொடர்புடையதாகக் கூறப்படும் அனைத்து நபர்களும் சட்ட விசாரணைகளை எதிர்கொள்ள வேண்டும்.
குறிப்பாக நிலக்கரி இறக்குமதி மற்றும் அரசாங்க நிதிப் பரிமாற்றங்களில் கூறப்படும் முறைகேடுகள் குறித்து முறையான விசாரணை அவசியம்.
சந்தேக நபர்களைக் கட்டாயப்படுத்தி வாக்குமூலம் பெற அழுத்தம் கொடுக்கப்படுவதாகவும், இது பாரதூரமான விளைவுகளுக்கு வழிவகுப்பதாகவும் அவர் கவலை வெளியிட்டார்.
சர்வதேச தரத்துடன் ஒப்பிடுகையில், இலங்கை அதிக செலவில் எரிபொருளைக் கொள்வனவு செய்வதாக நாமல் ராஜபக்ஷ குற்றம் சாட்டினார். அத்துடன், மின்சாரக் கட்டண உயர்வு மற்றும் வரிவிதிப்புக் கொள்கைகள் குறித்து அவர் கடும் விமர்சனங்களை முன்வைத்தார்.
அதிகரித்துள்ள மின்சாரக் கட்டணம் மற்றும் வரிகள் காரணமாக சிறு மற்றும் நடுத்தர வர்த்தகங்கள் மற்றும் சாதாரண குடும்பங்கள் பாரிய அழுத்தங்களுக்கு உள்ளாகியுள்ளதாக அவர் சுட்டிக்காட்டினார்.
அரசாங்கம் தனது தேர்தல் வாக்குறுதிகளை நிறைவேற்றத் தவறிவிட்டதுடன், அரச நிறுவனங்களின் நிர்வாகம் மற்றும் பொறுப்புக்கூறல் விடயத்திலும் பின்னடைவைக் கண்டுள்ளதாக அவர் சாடினார்.
அரசியல் ரீதியான அச்சுறுத்தல்கள் விடுக்கப்படுவதாகக் குற்றம் சாட்டிய அவர், ஜனநாயகச் சுதந்திரம் பாதுகாக்கப்பட வேண்டும் என்பதோடு, சட்டத்தை நடைமுறைப்படுத்துவதில் நியாயத்தன்மை உறுதிப்படுத்தப்பட வேண்டும் எனவும் வலியுறுத்தினார்.
சம்பவம் தொடர்பான மேலதிக விடயங்களை காவல்துறையினர் மற்றும் சம்பந்தப்பட்ட அதிகாரிகள் கண்காணித்து வருகின்றனர்.
