மின்னேரியா தேர்தல் தொகுதிக்கு உட்பட்ட கிராமமொன்றில் சுமார் 20 வீடுகளை மரஅட்டைகள் பெருமளவில் ஆக்கிரமித்துள்ளதால், அப்பகுதி மக்கள் கடும் அசௌகரியங்களுக்கு முகங்கொடுத்து வருகின்றனர்.
இதுகுறித்து பாதிக்கப்பட்ட மக்கள் தெரிவித்த தகவல்களை மேற்கோள்காட்டி, செய்திகள் வெளியிடப்பட்டுள்ளன.
மரவட்டைகள் வீடுகளின் உட்புறங்கள், வாசற்படிகள் மற்றும் சமையலறைகளுக்குள் புகுந்துள்ளதுடன், உணவுப் பொருட்களையும் மாசுபடுத்தி வருவதாகப் பாதிக்கப்பட்ட மக்கள் தெரிவித்துள்ளனர். இதனால் அன்றாட வாழ்க்கையை முன்னெடுப்பதில் பெரும் சிரமங்களை எதிர்கொள்வதாகவும் அவர்கள் குறிப்பிட்டுள்ளனர்.
மரஅட்டைகளைக் கட்டுப்படுத்துவதற்காகப் பூச்சிக்கொல்லிகளைத் தெளிப்பதன் மூலம் அவற்றில் சில தற்காலிகமாக உயிரிழப்பதாகவும், எனினும் குறுகிய காலத்திலேயே அவை முன்னரை விட அதிக எண்ணிக்கையில் மீண்டும் தோன்றுவதாகவும் மக்கள் தெரிவித்துள்ளனர்.
இதற்காக நாளொன்றுக்கு சுமார் 3,000 ரூபாவைச் செலவிட்டு பூச்சிக்கொல்லிகளை வாங்கிப் பயன்படுத்தி வருகின்ற போதிலும், இதுவரை நிரந்தரத் தீர்வொன்றைப் பெற முடியவில்லை என அவர்கள் கவலை வெளியிட்டுள்ளனர்.
எனவே, இந்த மரஅட்டைத் தொல்லை மேலும் பரவுவதற்கு முன்னர், அதனைக் கட்டுப்படுத்துவதற்கான பயனுள்ள நீண்டகாலத் தீர்வொன்றை சம்பந்தப்பட்ட அதிகாரிகள் உடனடியாக முன்னெடுக்க வேண்டும் என அப்பகுதி மக்கள் கோரிக்கை விடுத்துள்ளனர்.
