நீங்கள் தேநீர் பிரியரா? : நீங்கள் தெரிந்து கொள்ள வேண்டிய தகவல்!

தேநீரை எவ்வளவு சூடாகவும், எந்த அளவு செறிவுடனும், எந்த வகையில் அருந்துகிறோம் என்பது இதய ஆரோக்கியத்தில் தாக்கத்தை ஏற்படுத்தக்கூடும் எனப் புதிய ஆய்வொன்று தெரிவிக்கிறது. வழக்கமாகத் தேநீர் அருந்துவோருக்கு இருதய மற்றும் இரத்த நாள நோய்கள் ஏற்படும் அபாயம் குறைவாக இருக்கலாம் எனக் கண்டறியப்பட்டுள்ள அதேவேளை, மிக அதிக வெப்பநிலையில் தேநீர் அருந்துவோருக்கு அந்த அபாயம் அதிகரிக்கக்கூடும் எனவும் ஆய்வில் சுட்டிக்காட்டப்பட்டுள்ளது.

Journal of Internal Medicine மருத்துவ இதழில் புதன்கிழமை வெளியிடப்பட்ட இந்த ஆய்வு தொடர்பான தகவல்களை CNN வெளியிட்டுள்ளது. சீனாவைச் சேர்ந்த 30 முதல் 79 வயதுக்குட்பட்ட 485,000க்கும் அதிகமானோரின் தரவுகளை ஆய்வாளர்கள் பகுப்பாய்வு செய்துள்ளனர். அவர்களின் தேநீர் அருந்தும் பழக்கம், வாரத்தில் எத்தனை நாட்கள் தேநீர் அருந்துகின்றனர், விரும்பும் தேநீர் வகை, தேநீரின் செறிவு மற்றும் அருந்தும்போதுள்ள வெப்பநிலை ஆகியவை ஆய்வு செய்யப்பட்டன.

சுமார் ஒன்பது ஆண்டுகள் சராசரியாகத் தொடரப்பட்ட இந்த ஆய்வுக் காலத்தில், மாரடைப்பு, பக்கவாதம் மற்றும் புற இரத்த நாள நோய்கள் உள்ளிட்ட 14,800க்கும் அதிகமான இருதய நோய்ச் சம்பவங்கள் பதிவாகியுள்ளன.

வாரத்தில் குறைந்தது மூன்று நாட்களாவது தேநீர் அருந்தியவர்களுக்கு, அதைவிடக் குறைவாகத் தேநீர் அருந்தியவர்களுடன் ஒப்பிடுகையில், இரத்த நாள நோய்கள் ஏற்படும் அபாயம் சுமார் 11 சதவீதம் குறைவாக இருந்ததாக ஆய்வின் முடிவுகள் தெரிவிக்கின்றன.

ஆனால், வாயையும் தொண்டையையும் சுடும் அளவுக்கு மிகச் சூடாகத் தேநீர் அருந்துவதாகத் தெரிவித்தவர்களுக்கு, வழக்கமாகத் தேநீர் அருந்தாதவர்களுடன் ஒப்பிடுகையில், இரத்த நாள நோய்கள் ஏற்படும் அபாயம் 16 சதவீதம் அதிகமாக இருந்துள்ளது.

மிதமான செறிவுடைய தேநீர் அருந்துவதும் குறைந்த இருதய நோய் அபாயத்துடன் தொடர்புடையதாகக் கண்டறியப்பட்டுள்ளது. மேலும், பச்சைத் தேநீருடன் ஒப்பிடுகையில், கறுப்புத் தேநீர் பல்வேறு இருதய நோய்களின் குறைந்த அபாயத்துடன் ஒப்பீட்டளவில் தொடர்ச்சியான தொடர்பைக் கொண்டிருந்ததாக ஆய்வாளர்கள் குறிப்பிட்டுள்ளனர்.

தேநீர் இதய ஆரோக்கியத்திற்கு எவ்வாறு உதவுகிறது?

CNN ஊடகத்துக்கு வழங்கிய விளக்கத்தில், அவசர மருத்துவ நிபுணரும் ஜோர்ஜ் வொஷிங்டன் பல்கலைக்கழகத்தின் மருத்துவப் பேராசிரியருமான டொக்டர் லீனா வென், தேநீரில் இயற்கையாகக் காணப்படும் பொலிபீனோல்கள் (Polyphenols) மற்றும் ஃபிளவனோய்டுகள் (Flavonoids) போன்ற சேர்மங்கள் இதய ஆரோக்கியத்திற்கு நன்மையளிக்கக்கூடும் எனத் தெரிவித்துள்ளார்.

இந்தச் சேர்மங்களுக்கு ஒட்சியேற்ற எதிர்ப்பு மற்றும் அழற்சி எதிர்ப்புப் பண்புகள் உள்ளன. இவை இரத்த நாளங்களின் உட்புறச் செல்களைப் பாதுகாக்கவும், தமனிகள் தளர்ந்து விரிவடையும் திறனை மேம்படுத்தவும் உதவக்கூடும். இதன் மூலம் இரத்த அழுத்தத்தைக் குறைத்து, இதயத்தின் மீதான அழுத்தத்தையும் தணிக்க முடியும் என அவர் விளக்கியுள்ளார்.

சில முந்தைய ஆய்வுகளிலும் தேநீர் அருந்துவது இரத்த அழுத்தம், கொலஸ்ட்ரோல் அளவு மற்றும் இருதய ஆரோக்கியத்துடன் தொடர்புடைய ஏனைய குறியீடுகளை ஓரளவு மேம்படுத்தக்கூடும் எனக் கண்டறியப்பட்டுள்ளது. இத்தகைய விளைவுகள், தேநீர் அருந்துவோரிடையே மாரடைப்பு மற்றும் பக்கவாதம் போன்ற நோய்கள் குறைவாகக் காணப்படுவதற்கு ஒரு காரணமாக இருக்கலாம்.

மேலும், சர்க்கரை சேர்க்கப்பட்ட குளிர்பானங்கள் அல்லது இனிப்புப் பானங்களுக்குப் பதிலாகச் சர்க்கரை சேர்க்காத தேநீரைத் தெரிவுசெய்வதும் நன்மையளிக்கக்கூடும். இதன் மூலம் மேலதிக சர்க்கரை உட்கொள்ளலைக் குறைத்து, உடல் எடை மற்றும் வளர்சிதை மாற்ற ஆரோக்கியத்தைப் பேண முடியும் என டொக்டர் வென் குறிப்பிட்டுள்ளார்.

கறுப்புத் தேநீரா, பச்சைத் தேநீரா – எது சிறந்தது?

கறுப்புத் தேநீரும் பச்சைத் தேநீரும் Camellia sinensis என்ற ஒரே தாவரத்திலிருந்து தயாரிக்கப்படுகின்றன. எனினும், தேயிலை இலைகள் பதப்படுத்தப்படும் முறையில் உள்ள வேறுபாடுகள் காரணமாக, அவற்றில் காணப்படும் பொலிபீனோல்களின் கலவையும் மாறுபடுகிறது.

கறுப்புத் தேநீர் அருந்துவோரிடம் பல்வேறு இருதய நோய்களின் அபாயம் குறைவாக இருப்பதற்கான தொடர்பு இந்த ஆய்வில் தொடர்ச்சியாகக் காணப்பட்டாலும், பச்சைத் தேநீரும் நன்மைகளுடன் தொடர்புடையதாக இருந்துள்ளது.

எனவே, பச்சைத் தேநீரை விரும்பி அருந்துபவர்கள் கறுப்புத் தேநீருக்கு மாற வேண்டும் என்றோ, கறுப்புத் தேநீர் அருந்துபவர்கள் பச்சைத் தேநீருக்கு மாற வேண்டும் என்றோ பரிந்துரைக்க முடியாது என டொக்டர் வென் தெரிவித்துள்ளார். இரண்டு வகைத் தேநீரையும் சர்க்கரை சேர்க்காமல் அருந்துவது ஆரோக்கியமான உணவுப் பழக்கத்தின் ஒரு பகுதியாக அமையலாம் என்றும் அவர் குறிப்பிட்டுள்ளார்.

நாளொன்றுக்கு எத்தனை கப் தேநீர் அருந்தலாம்?

வாரத்தில் குறைந்தது ஒருமுறையாவது தேநீர் அருந்திய ஆய்வுப் பங்கேற்பாளர்களிடையே, நாளொன்றுக்கு சுமார் ஆறு முதல் எட்டு கப் தேநீர் அருந்தியவர்களுக்கு இரத்த நாள நோய்கள் ஏற்படும் அபாயம் மிகக் குறைவாகக் கணிக்கப்பட்டுள்ளது. ஆனால், இந்த அளவைத் தாண்டி மிக அதிகமாகத் தேநீர் அருந்தும்போது அபாயம் மீண்டும் அதிகரிக்கத் தொடங்கியதாக ஆய்வு தெரிவிக்கிறது.

இருப்பினும், அனைவரும் நாளொன்றுக்கு ஆறு முதல் எட்டு கப் தேநீர் அருந்த வேண்டும் என்று இதனைப் பொருள்கொள்ளக் கூடாது என ஆய்வாளர்கள் எச்சரித்துள்ளனர். ஆய்வில் பயன்படுத்தப்பட்ட கப்புகளின் அளவு ஒரே தரத்தில் நிர்ணயிக்கப்படவில்லை என்பதுடன், பங்கேற்பாளர்கள் தாங்களாகவே வழங்கிய தகவல்களின் அடிப்படையிலேயே தேநீர் உட்கொள்ளும் அளவு கணிக்கப்பட்டுள்ளது. எனவே, இந்த எண்ணிக்கையை அனைவருக்கும் பொருந்தக்கூடிய பரிந்துரைக்கப்பட்ட அளவாகக் கருத முடியாது.

தேநீரில் கஃபீன் (Caffeine) இருப்பதும் கவனத்தில் கொள்ள வேண்டிய விடயமாகும். பொதுவாக, எட்டு அவுன்ஸ் (சுமார் 237 மில்லிலீற்றர்) கறுப்புத் தேநீரில் 30 முதல் 50 மில்லிகிராம் வரை கஃபீன் காணப்படலாம். பச்சைத் தேநீரில் பொதுவாக இதைவிடக் குறைவான அளவு காணப்பட்டாலும், கஃபீன் நீக்கப்பட்டதாகத் தெளிவாகக் குறிப்பிடப்படாதவரை அதில் கஃபீன் இருக்கலாம்.

அமெரிக்க உணவு மற்றும் மருந்து நிர்வாகத்தின் (FDA) தகவலின்படி, நாளொன்றுக்கு 400 மில்லிகிராம் வரையிலான கஃபீன் பெரும்பாலான ஆரோக்கியமான பெரியவர்களிடம் பொதுவாக ஆபத்தான விளைவுகளுடன் தொடர்புபடுவதில்லை. கர்ப்பிணிகள் நாளொன்றுக்கு 200 மில்லிகிராமுக்கு மேல் கஃபீன் உட்கொள்ளாமல் இருக்க அறிவுறுத்தப்படுகின்றனர். சிறுவர்கள் கஃபீன் கலந்த பானங்களை அருந்துவதைத் தவிர்க்க வேண்டும்.

தேநீர் அருந்துவோர் கவனிக்க வேண்டியவை

வாயையும் தொண்டையையும் சுடும் அளவுக்கு அதிக வெப்பநிலையில் தேநீர் அருந்துவதைத் தவிர்க்க வேண்டும் என டொக்டர் வென் அறிவுறுத்தியுள்ளார். மிகச் சூடான பானங்களைத் தொடர்ச்சியாக அருந்துவது உணவுக்குழாய் புற்றுநோய் ஏற்படும் அதிகரித்த அபாயத்துடனும் தொடர்புபடுத்தப்பட்டுள்ளது.

தேநீரை வசதியாகச் சிறிது சிறிதாக அருந்தக்கூடிய வெப்பநிலைக்கு ஆறவைத்த பின்னர் குடிப்பது, சூட்டினால் ஏற்படும் பாதிப்புகளைத் தவிர்க்க உதவும். அதேவேளை, சர்க்கரை சேர்க்காத கறுப்புத் தேநீர், பச்சைத் தேநீர் அல்லது தமக்குப் பிடித்த ஏனைய தேநீர் வகைகளைத் தெரிவுசெய்யலாம் என்றும் அவர் தெரிவித்துள்ளார்.

தூக்கமின்மை, பதற்றம் அல்லது இதயத் துடிப்பு அதிகரித்தல் போன்ற பிரச்சினைகளை எதிர்கொள்பவர்கள், தாங்கள் நாளொன்றுக்கு உட்கொள்ளும் மொத்த கஃபீன் அளவைக் கவனத்தில் கொள்ள வேண்டும்.

தற்போது தேநீர் அருந்தாதவர்கள், இதய ஆரோக்கியத்திற்காகப் புதிதாகத் தேநீர் அருந்தத் தொடங்க வேண்டிய கட்டாயமில்லை என்றும் டொக்டர் வென் குறிப்பிட்டுள்ளார். வழக்கமான உடற்பயிற்சி, புகைப்பிடிப்பதைத் தவிர்த்தல், இரத்த அழுத்தம் மற்றும் கொலஸ்ட்ரோல் அளவைக் கட்டுப்பாட்டில் வைத்திருத்தல், சத்தான உணவுகளை உட்கொள்ளுதல் போன்ற நடவடிக்கைகளும் இருதய நோய் அபாயத்தைக் குறைப்பதற்கான முக்கிய வழிமுறைகளாகும்.

முக்கிய குறிப்பு: இந்த ஆய்வு தேநீர் அருந்தும் பழக்கத்திற்கும் இருதய நோய் அபாயத்திற்கும் இடையிலான தொடர்பைக் காட்டுகிறது. தேநீர் அருந்துவதால் மட்டுமே நோய் அபாயம் குறைகிறது என்பதை இது உறுதிப்படுத்தவில்லை. குறிப்பாக, தேநீரை மிகச் சூடாக அருந்துவதைத் தவிர்ப்பதும், சர்க்கரை மற்றும் கஃபீன் உட்கொள்ளலைக் கட்டுப்படுத்துவதும் கவனிக்க வேண்டிய விடயங்களாகும்.