இலங்கையின் நீதித்துறை கட்டமைப்பை விரைவாக டிஜிட்டல் மயமாக்கும் நடவடிக்கைகளின் ஒரு பகுதியாக, நாடளாவிய ரீதியில் உள்ள 350 நீதிமன்றங்களுக்கு 1,050 உத்தியோகபூர்வ மின்னஞ்சல் கணக்குகளை உருவாக்க அரசாங்கம் நடவடிக்கை எடுத்துள்ளது.
இந்த மின்னஞ்சல் கணக்குகள் courts.gov.lk என்ற உத்தியோகபூர்வ இணையதளக் களத்தின் கீழ் இயங்கவுள்ளதுடன், நீதிமன்ற நடவடிக்கைகள் மற்றும் நிர்வாகப் பணிகளுக்கு ஆதரவாக, குரலை எழுத்தாக மாற்றும் தொழில்நுட்பம் மற்றும் காணொளி மாநாட்டு வசதிகளும் அறிமுகப்படுத்தப்படவுள்ளன.
இலங்கையில் உள்ள அனைத்து நீதிமன்றங்களையும் டிஜிட்டல் மயமாக்கும் நோக்கத்துடன் முன்னெடுக்கப்படும் ‘e-Court’ திட்டத்தின் கீழ் இந்த வசதிகளை வழங்குவதற்கான நீதி மற்றும் தேசிய ஒருமைப்பாட்டு அமைச்சர் சமர்ப்பித்த முன்மொழிவுக்கு அமைச்சரவை அனுமதி வழங்கியுள்ளது.
‘e-Court’ திட்டத்திற்கு 2025 டிசம்பரில் அமைச்சரவை ஆரம்ப அனுமதி வழங்கியிருந்தது. தற்போது நீதவான் நீதிமன்றங்கள், மாவட்ட நீதிமன்றங்கள் மற்றும் உயர் நீதிமன்றங்களுக்கான வழக்கு கோப்பு முகாமைத்துவத்தை எளிதாக்கும் டிஜிட்டல் கட்டமைப்புகள் உருவாக்கப்பட்டு வருகின்றன.
நீதித்துறை டிஜிட்டல் மயமாக்கல் திட்டத்தின் முக்கிய தேவையாக, நீதித்துறை கட்டமைப்பின் அனைத்து மட்டங்களிலும் பணியாற்றும் அதிகாரிகளுக்கும் உத்தியோகபூர்வ மின்னஞ்சல் வசதிகளை வழங்க திட்டமிடப்பட்டுள்ளது.
இதனுடன், நீதிமன்றங்களில் நிலவும் தட்டச்சாளர்கள் மற்றும் சுருக்கெழுத்தாளர்களின் பற்றாக்குறையை நிவர்த்தி செய்யும் வகையில், வாய்மொழியாக பதிவு செய்யப்படும் வாக்குமூலங்கள் மற்றும் அறிக்கைகளை உடனடியாக எழுத்து வடிவமாக மாற்றும் குரல்-எழுத்து தொழில்நுட்பமும் அறிமுகப்படுத்தப்படவுள்ளது.
மேலும், நடைமுறையில் உள்ள சட்ட ஏற்பாடுகளுக்கு அமைவாக நீதிமன்ற நடவடிக்கைகளை இணையவழியில் முன்னெடுப்பதற்கு வசதியாக, நீதிமன்றங்களுக்கு காணொளி மாநாட்டு வசதிகளும் வழங்கப்படவுள்ளன.
முன்மொழியப்பட்டுள்ள 1,050 மின்னஞ்சல் கணக்குகளும் நீதி மற்றும் தேசிய ஒருமைப்பாட்டு அமைச்சினால் தற்போது பயன்படுத்தப்படும் மின்னஞ்சல் கட்டமைப்பின் ஊடாக வழங்கப்படவுள்ளன. இதில் குரலை எழுத்தாக மாற்றும் தொழில்நுட்பம் மற்றும் காணொளி மாநாட்டு வசதிகளும் ஒருங்கிணைக்கப்படவுள்ளன.
