கொழும்பு லோட்டஸ் சந்தி, துறைமுக அணுகல் மேம்பாலம் மற்றும் மரைன் டிரைவ் இணைப்புச் சாலை ஆகிய பகுதிகளில் நிலவும் போக்குவரத்து நெரிசலைக் குறைப்பதற்கான நடவடிக்கைகளை அடையாளம் காண 91.21 மில்லியன் ரூபா செலவில் சாத்தியக்கூறு ஆய்வு மேற்கொள்ளப்படவுள்ளது.
இதற்கான ஆலோசனை சேவை ஒப்பந்தத்தை M/s Master Hellie’s Engineering Consultants (Pvt) Ltd நிறுவனத்துக்கு வழங்க அமைச்சரவை அனுமதி வழங்கியுள்ளது. அமைச்சரவையால் நியமிக்கப்பட்ட ஆலோசனை சேவைகள் கொள்முதல் குழுவின் பரிந்துரையின் அடிப்படையில் இந்த ஒப்பந்தம் வழங்கப்படவுள்ளது.
ஒப்பந்தத்தின் உள்ளூர் செலவுப் பகுதி 52.44 மில்லியனாகவும், வெளிநாட்டு செலவுப் பகுதி 122,859 அமெரிக்க டொலர்களாகவும் அமைந்துள்ளது. வற் (VAT) வரி தவிர்த்து ஒப்பந்தத்தின் மொத்த பெறுமதி 91.21 மில்லியனாகும்.
இந்தச் சாத்தியக்கூறு ஆய்வை மேற்கொள்வதற்கான ஆலோசனை நிறுவனத்தைத் தெரிவு செய்ய வீதி அபிவிருத்தி அதிகாரசபை முன்னதாக விருப்ப வெளிப்பாடுகளை கோரியிருந்தது.
அதனைத் தொடர்ந்து மேற்கொள்ளப்பட்ட ஆரம்பத் தெரிவு நடவடிக்கையின் பின்னர், ஐந்து ஆலோசனை நிறுவனங்கள் தங்களது முன்மொழிவுகளை சமர்ப்பிக்க அழைக்கப்பட்டிருந்தன.
ஒப்பந்தத்தை வழங்குவதற்கான முன்மொழிவு போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் மூலம் அமைச்சரவைக்கு சமர்ப்பிக்கப்பட்டதையடுத்து, அதற்கு அமைச்சரவை அனுமதி வழங்கியுள்ளது.
