தேசிய வாசிப்பு மாதத்தை முன்னிட்டு “வாழ்நாள் முழுவதும் எழுத்தே நண்பன்” எனும் தொனிப்பொருளில் நடைபெற்ற போட்டி நிகழ்வுகளில் பங்குபற்றி வெற்றி பெற்ற மாணவர்களுக்கான பரிசளிப்பு நிகழ்வும், பாடசாலை ரீதியாக சாதனை படைத்த சாதனையாளர்களுக்கான கௌரவிப்பு நிகழ்வும், நாவிதன்வெளி பிரதேச சபையினுடைய ஏற்பாட்டில் நடைபெற்றது.
நாவிதன்வெளி பிரதேச சபை தவிசாளர் இ.ரூபசாந்தன் தலைமையில் நடைபெற்ற இந்நிகழ்வில், நாவிதன்வெளி பிரதேச சபை உபதவிசாளர் கே. புவனரூபன், சபை செயலாளர் பா.சதீஸ்கரன், பிரதேச சபை உறுப்பினர்கள், நடுவர்களாக பங்காற்றிய ஓய்வுநிலை கல்வியியலாளர்களான ஜே. டேவிட், க.வரதராஜன், கே.சாந்தகுமார், நாவிதன்வெளி கோட்ட பாடசாலைகளின் அதிபர்கள், நூலக உதவியாளர், சமூகமட்ட அமைப்புக்களின் பிரதிநிதிகள், மாணவர்கள் மற்றும் பெற்றோர்கள் என பலரும் கலந்து கொண்டிருந்தனர்.
வாசிப்பு பழக்கத்தை ஊக்குவித்து திறமையான மாணவர்களை கண்டெடுக்கும் நோக்கில் பேச்சு, வாசிப்பு, கவிதை, கட்டுரை, சித்திரம், விவாதம் ஆகிய ஆறு போட்டிகள் நடாத்தப்பட்டிருந்தன. அவற்றின் வெற்றியாளர்களுக்கு சான்றிதழ்களும், பரிசில்களும் வழங்கி வைக்கப்பட்டன.
இப்போட்டிகளுக்கு நடுவர்களாக கடமையாற்றியவர்களும் பிரதேச சபையினால் கௌரவிக்கப்பட்டனர். அதேபோல புலமைப்பரிசில் பரீட்சையில் சித்தியடைந்த மாணவர்களுக்கும், சாதாரண தரப் பரீட்சையில் 9 பாடங்களிலும் திறமைச்சித்தி பெற்ற மாணவர்களும் கௌரவிக்கப்பட்டனர்.
வருடா வருடம் தேசிய வாசிப்பு மாத நிகழ்வுகள் நடைபெற்றிருந்தாலும் இம்முறை மேலும் சிறப்பான கௌரவிப்பு நிகழ்வாக இது இடம்பெறுவதற்கு பிரதேச சபையினுடைய தவிசாளர், உபதவிசாளர் உட்பட உறுப்பினர்களும் பங்களிப்பினை வழங்கியிருந்தமை குறிப்பிடத்தக்கது.
