தொழிற்கல்வித் தரத்தை மேம்படுத்த பிலிப்பைன்ஸ் நிறுவனத்துடன் ஒப்பந்தத்தைப் புதுப்பிக்க அமைச்சரவை அனுமதி

இலங்கையின் தொழில்நுட்ப மற்றும் தொழிற்கல்வி, பயிற்சித் துறையை வலுப்படுத்தும் நோக்கில், இலங்கை மூன்றாம் நிலை மற்றும் தொழிற்கல்வி ஆணைக்குழுவுக்கும் (TVEC), பிலிப்பைன்ஸைத் தளமாகக் கொண்ட ஆசிய–பசிபிக் அங்கீகாரம் மற்றும் சான்றிதழ் ஆணைக்குழுவுக்கும் (APACC) இடையிலான புரிந்துணர்வு ஒப்பந்தத்தைப் புதுப்பிக்க அரசாங்கம் தீர்மானித்துள்ளது.

இதற்கமைய, புதிய ஒப்பந்தத்தில் கையெழுத்திடுவதற்கான பிரதமரும் கல்வி, உயர்கல்வி மற்றும் தொழிற்கல்வி அமைச்சருமான ஹரிணி அமரசூரிய சமர்ப்பித்த முன்மொழிவுக்கு அமைச்சரவை அங்கீகாரம் வழங்கியுள்ளது.

இரு நிறுவனங்களுக்கும் இடையில் முன்னர் ஐந்து ஆண்டுகளுக்கான புரிந்துணர்வு ஒப்பந்தம் கைச்சாத்திடப்பட்டிருந்தது. இலங்கையின் தொழில்நுட்ப மற்றும் தொழிற்கல்வி, பயிற்சி முறைமையில் அங்கீகாரம் மற்றும் சான்றிதழ் வழங்குவதற்கான தரநிலைகளை மேம்படுத்துவதே அந்த ஒப்பந்தத்தின் பிரதான நோக்கமாக இருந்தது.

எனினும், முந்தைய ஒப்பந்தத்தின் செல்லுபடியாகும் காலம் நிறைவடைந்துள்ளதால், இரு நிறுவனங்களுக்கும் இடையிலான ஒத்துழைப்பைத் தொடரவும் விரிவுபடுத்தவும் புதிய புரிந்துணர்வு ஒப்பந்தமொன்றைச் செய்துகொள்ள முன்மொழியப்பட்டுள்ளது.

தொழிற்கல்வித் துறையில் பிராந்திய ஒத்துழைப்பை வலுப்படுத்துதல் மற்றும் இலங்கையில் தொழிற்கல்வியின் தரம், தரநிலைகளை மேம்படுத்துவதற்காக ஆசிய–பசிபிக் அங்கீகாரம் மற்றும் சான்றிதழ் ஆணைக்குழு நிறுவனத்திடமிருந்து தொழில்நுட்ப உதவிகளைப் பெற்றுக்கொள்ளுதல் ஆகியவை புதிய ஒப்பந்தத்தின் முக்கிய நோக்கங்களாகும்.

அத்துடன், தொழிற்பயிற்சி வழங்கும் நிறுவனங்களுக்கு சர்வதேச அங்கீகாரம் மற்றும் சான்றிதழ்களைப் பெற்றுக்கொள்வதை ஊக்குவிப்பதுடன், இலங்கையின் தேசிய தொழிற்தகைமைத் தகுதிக் கட்டமைப்பையும் (NVQ Framework) மேலும் வலுப்படுத்துவது இதன் மற்றுமொரு நோக்கமாகும்.

மேலும், இலங்கையில் அங்கீகார நடவடிக்கைகளுக்கான தேசிய ஒருங்கிணைப்பாளர் ஒருவரை நியமிப்பதற்கும் இந்த ஒப்பந்தம் வழிவகுக்கும் என எதிர்பார்க்கப்படுகிறது.

ஆசிய–பசிபிக் அங்கீகாரம் மற்றும் சான்றிதழ் ஆணைக்குழு நிறுவனத்தின் நடைமுறைகள் மற்றும் தரநிலைகளுக்கு அமைவாக உள்ளூர் அங்கீகார மதிப்பீட்டாளர்களை அடையாளம் கண்டு அவர்களுக்குப் பயிற்சியளிப்பதும், எதிர்கால அங்கீகார நடவடிக்கைகளை முன்னெடுப்பதற்கான திறன்களை மேம்படுத்துவதும் இதன் மற்றுமொரு முக்கிய நோக்கமாகும்.

இதற்கமைய, இரு நிறுவனங்களும் முன்மொழியப்பட்ட புரிந்துணர்வு ஒப்பந்தத்தில் கையெழுத்திடுவதற்கு அமைச்சரவை அனுமதி வழங்கியுள்ளது.