வைத்தியசாலையின் நான்காவது மாடியில் இருந்து விழுந்து உயிரிழந்த நோயாளி

களுபோவில போதனா வைத்தியசாலையில் சிகிச்சை பெற்று வந்த நோயாளி ஒருவர் நான்காவது மாடியில் இருந்து விழுந்து உயிரிழந்துள்ளார்.

இச்சம்பவம் இன்று புதன்கிழமை அதிகாலை இடம்பெற்றுள்ளதாக வைத்தியசாலை தகவல்கள் தெரிவிக்கின்றன.

கோனாபொல கந்தேவத்த பகுதியைச் சேர்ந்த 65 வயதுடைய ஒருவரே இவ்வாறு உயிரிழந்துள்ளார்.

தொண்டைப் புற்று நோய் காரணமாக மூன்று மாதங்களாக களுபோவில போதனா வைத்தியசாலையில் உள்நோயாளியாக சிகிச்சை பெற்று வந்த அவர், இன்று அதிகாலை 03:00 மணியளவில் நான்காம் மாடியில் உள்ள ஜன்னலில் இருந்து தரையில் குதித்து உயிரிழந்துள்ளதாக தெரிவிக்கப்படுகின்றது.

இச்சம்பவம் குறித்து மேலதிக விசாரணைகளை கொஹுவல பொலிஸார் மேற்கொண்டுள்ளனர்.