பத்து வருடங்களுக்குப் பின்னர் இலங்கைக்கான விமான சேவையை பிரிட்டிஷ் எயார்வேஸ் நிறுவனம் மீண்டும் ஆரம்பித்துள்ளது. இதன் முதலாவது விமானம் இன்று சனிக்கிழமை காலை கட்டுநாயக்க, பண்டாரநாயக்க சர்வதேச விமான நிலையத்தை வந்தடைந்தது.
லண்டன் கேட்விக் விமான நிலையத்திலிருந்து BA2045 என்ற விமான இலக்கத்துடன் பயணித்த போயிங் 777-200ER ரக விமானமே கொழும்பை வந்தடைந்துள்ளது. இதன் மூலம் பிரிட்டிஷ் எயார்வேஸ் நிறுவனம் இலங்கைக்கான தனது விமான சேவையை மீண்டும் ஆரம்பித்துள்ளது.
இதற்கமைய, லண்டன் கேட்விக் மற்றும் கொழும்பு இடையே வாரத்திற்கு மூன்று விமான சேவைகளை முன்னெடுக்க அந்நிறுவனம் திட்டமிட்டுள்ளது. இதன் மூலம் இலங்கைக்கும் ஐக்கிய இராச்சியத்துக்கும் இடையிலான விமானப் போக்குவரத்து இணைப்பு மேலும் வலுப்பெறும் என எதிர்பார்க்கப்படுகிறது.
இந்த விமான சேவை மீள ஆரம்பிக்கப்பட்டுள்ளமை இலங்கையின் சுற்றுலாத்துறைக்கு ஊக்கமளிக்கும் என எதிர்பார்க்கப்படுகிறது. குறிப்பாக, ஐக்கிய இராச்சியம் இலங்கையின் முக்கிய சுற்றுலாப் பயணிகள் வருகை தரும் நாடுகளில் ஒன்றாக விளங்குகின்றமை குறிப்பிடத்தக்கது.
அத்துடன், இரு நாடுகளுக்கும் இடையிலான வர்த்தகம், சுற்றுலா, வணிகப் பயணங்கள் மற்றும் மக்கள் தொடர்புகளை மேம்படுத்துவதற்கும் இந்தச் சேவை உதவும் என எதிர்பார்க்கப்படுகிறது.
இலங்கையின் ஹேலீஸ் குழுமத்தின் துணை நிறுவனமான அட்வான்டிஸ் ஏவியேஷன் சர்வீசஸ், பிரிட்டிஷ் எயார்வேஸ் நிறுவனத்தின் இலங்கைக்கான பொது விற்பனை முகவராக (GSA) செயற்படவுள்ளது.
பிரிட்டிஷ் எயார்வேஸ் வெளியிட்டுள்ள தகவலின்படி, கொழும்புக்கான இந்த விமான சேவை குளிர்கால விமான அட்டவணையின் கீழ் பருவகால சேவையாக முன்னெடுக்கப்படும். பயணிகளுக்காக எக்கனமி, பிரீமியம் எக்கனமி மற்றும் பிஸினஸ் வகுப்பு இருக்கை வசதிகளும் வழங்கப்படவுள்ளன.
