நாடு திரும்பினார் ஷிரந்தி ராஜபக்ஷ

முன்னாள் ஜனாதிபதி மஹிந்த ராஜபக்ஷவின் மனைவி ஷிரந்தி ராஜபக்ஷ, தனது தனிப்பட்ட வெளிநாட்டுப் பயணத்தை முடித்துக்கொண்டு நேற்று திங்கட்கிழமை இரவு நாடு திரும்பியுள்ளார்.

மலேசியாவின் கோலாலம்பூர் நகரத்திலிருந்து வருகை தந்த மலேசியன் எயர்லைன்ஸுக்குச் சொந்தமான MH 179 என்ற விமானத்தின் மூலம் அவர் நேற்றிரவு 11.25 மணியளவில் கட்டுநாயக்க, பண்டாரநாயக்க சர்வதேச விமானநிலையத்தைச் வந்தடைந்துள்ளார்.

விமானநிலையத்தை வந்தடைந்த அவர், சாதாரண பயணிகள் முனையங்களைத் தவிர்த்து, கட்டுநாயக்க விமானநிலையத்தில் அமைக்கப்பட்ட கட்டணம் செலுத்திப் பெற்றுக்கொள்ளும் விசேட பிரமுகர் வசதியான ‘Gold Route’ முனையத்தின் ஊடாக வெளியேறியதாக தெரிவிக்கப்படுகின்றது.

கடந்த செப்டம்பர் 16ஆம் திகதி அதிகாலை அவர் தனது மகனான ரோஹித ராஜபக்ஷவின் மாமியார் (சகோதரியின் கணவரின் தாய்) ஆன் டி லிவேராவுடன் சிங்கப்பூர் நோக்கிப் புறப்பட்டுச் சென்றிருந்தார். எனினும், திருமதி லிவேரா சில நாட்களுக்கு முன்னரே நாட்டிற்குத் திரும்பியிருந்தார்.

சர்ச்சைக்குரிய ‘சிரிலிய சவிய’ நிதியக் கணக்கின் நிதிப் பரிவர்த்தனைகள் தொடர்பான விசாரணைக்கு அமைவாகச் சட்ட நடவடிக்கைகள் சில முன்னெடுக்கப்பட்டு வரும் பின்னணியிலேயே ஷிரந்தி ராஜபக்ஷ இவ்வாறு நாட்டிற்கு வந்துள்ளார்.

குறித்த விசாரணை தொடர்பில் வாக்குமூலம் வழங்குவதற்காகப் பொலிஸ் நிதி குற்றப் புலனாய்வுக் கோட்டத்தின் (FCID) முன்னிலையில் ஆஜராகுமாறு அவருக்கு முன்னர் அறிவிக்கப்பட்டிருந்தது. அதற்குப் பதிலளிக்கும் வகையில், இரு வார காலப்பகுதிக்குள் ஆஜராவதாக அவர் கடந்த செப்டம்பர் 24ஆம் திகதி எழுத்துமூலம் அறிவித்திருந்ததாகத் தகவல்கள் தெரிவிக்கின்றன.

இதனிடையே, மருத்துவச் சிகிச்சை பெற்று மீண்டும் நாடு திரும்பும்போது தன்னை அச்சுறுத்தி அல்லது அநியாயமாகக் கைது செய்யும் தயார்நிலை காணப்படுவதாகத் தெரிவித்து, எந்தவொரு பிணை நிபந்தனையின் கீழும் விடுவிக்குமாறு கோரி அவர் தனது சட்டத்தரணிகள் ஊடாக மாளிகாகந்த நீதவான் நீதிமன்றத்தில் முன்பிணை (Anticipatory bail) மனுவொன்றையும் தாக்கல் செய்திருந்தார். அதன் எதிர்மனுதாரராகக் குற்றப் புலனாய்வுத் திணைக்களத்தின் (CID) பணிப்பாளர் பெயரிடப்பட்டுள்ளார்.

குறித்த முன்பிணை மனு தொடர்பான மேலதிக நீதிமன்ற நடவடிக்கைகள் மற்றும் நிதி குற்றப் புலனாய்வுப் பிரிவின் முன்னிலையில் வாக்குமூலம் அளிக்கும் செயற்பாடுகள் எதிர்வரும் சில நாட்களில் இடம்பெறும் எனச் சட்டத் துறை வட்டாரங்கள் சுட்டிக்காட்டுகின்றன.