சிங்கராஜ வனப்பகுதியில் இருந்து 250க்கும் மேற்பட்ட பூச்சிகள் மற்றும் ஊர்வனவற்றைச் சேகரித்ததாகக் குற்றஞ்சாட்டப்பட்ட நான்கு சீனப் பிரஜைகளையும் எதிர்வரும் நவம்பர் 23ஆம் திகதி வரை விளக்கமறியலில் வைக்குமாறு களவானை நீதவான் நீதிமன்றம் உத்தரவிட்டுள்ளது.
மூன்று ஆண்களும் ஒரு பெண்ணும் அடங்கிய குறித்த நால்வரும், சிங்கராஜ வனப்பகுதியின் இடையக வலயத்தில் இலங்கைக்கே உரித்தான பூச்சிகள் மற்றும் ஊர்வனவற்றைச் சேகரித்துக் கொண்டிருந்தபோது வனவிலங்கு பாதுகாப்புத் திணைக்கள அதிகாரிகளால் கைது செய்யப்பட்டுள்ளனர்.
உடவளவை தேசிய பூங்காவின் பனஹடுவ வனவிலங்கு பாதுகாப்பு அலுவலகத்திற்குக் கிடைத்த தகவலின் அடிப்படையில் இந்தக் கைது நடவடிக்கை முன்னெடுக்கப்பட்டுள்ளதாக வனவிலங்கு பாதுகாப்புத் திணைக்களம் தெரிவித்துள்ளது.
இதன்போது, சந்தேகநபர்களிடமிருந்து சுமார் 40 விலங்கு இனங்களைச் சேர்ந்த 250க்கும் மேற்பட்ட மாதிரிகளை வனவிலங்கு அதிகாரிகள் கைப்பற்றியுள்ளனர்.
கைப்பற்றப்பட்ட மாதிரிகளுடன் சந்தேகநபர்கள் நேற்று திங்கட்கிழமை களவானை நீதவான் நீதிமன்றத்தில் ஆஜர்படுத்தப்பட்டனர். இதனையடுத்து, அவர்களை நவம்பர் 23ஆம் திகதி வரை விளக்கமறியலில் வைக்குமாறு நீதவான் உத்தரவிட்டுள்ளார்.
அத்துடன், உயிருடனும் உயிரிழந்த நிலையிலும் கைப்பற்றப்பட்ட விலங்கு மாதிரிகளை அடையாளம் காண்பதற்காக இன்று செவ்வாய்க்கிழமை தேசிய அருங்காட்சியகத்திடம் ஒப்படைக்கவும், அதன் பின்னர் அவற்றை மீண்டும் இயற்கைச் சூழலில் விடுவிக்கவும் நீதவான் உத்தரவிட்டுள்ளார்.
கைது செய்யப்பட்ட சந்தேகநபர்கள் இதற்கு முன்னரும் இலங்கைக்கு வருகை தந்துள்ளதாக விசாரணைகளில் தெரியவந்துள்ளது. சம்பவம் தொடர்பான மேலதிக விசாரணைகள் தொடர்ந்து முன்னெடுக்கப்பட்டு வருகின்றன.
இதேவேளை, சில தினங்களுக்கு முன்னர் பாபாவ உடரகந்த வனப் பாதுகாப்புப் பிரதேசத்தில் இதேபோன்ற மரபணு வளத் திருட்டில் ஈடுபட்டதாகக் குற்றஞ்சாட்டப்பட்ட வெளிநாட்டுப் பிரஜைகள் குழுவொன்றுக்கு நீதிமன்றம் 10 மில்லியன் ரூபாவுக்கும் அதிகமான அபராதம் விதித்துள்ளதாகவும் வனவிலங்கு பாதுகாப்புத் திணைக்களம் தெரிவித்துள்ளது.
