அவுஸ்திரேலியாவின் இறுக்கமான மாணவர் விசா கொள்கைகளால் அதிகம் பாதிக்கப்பட்டுள்ள நாடுகளில் இலங்கையும் உள்வாங்கப்பட்டுள்ளது.
அண்மைய தரவுகளின்படி, உயர்கல்வி விசாக்கள் நிராகரிக்கப்படும் வீதம் சடுதியாக அதிகரித்துள்ளது.
அவுஸ்திரேலிய உள்நாட்டலுவல்கள் திணைக்களத்தின் புள்ளிவிபரங்களின்படி, 2026 பெப்ரவரி மாதத்தில் இலங்கையிலிருந்து சமர்ப்பிக்கப்பட்ட மாணவர் விசா விண்ணப்பங்களில் 38% நிராகரிக்கப்பட்டுள்ளன.
இதன் மூலம் அதிக விசா நிராகரிப்பு வீதத்தைக் கொண்ட முதல் ஐந்து நாடுகளுக்குள் இலங்கை இடம்பிடித்துள்ளது.
பிராந்திய நாடுகளின் விசா நிராகரிப்பு விபரங்கள்:
நேபாளம்: 65% (அதிகூடிய நிராகரிப்பு)
வங்காளதேசம்: 51%
இந்தியா: 40%
இலங்கை: 38%
பூட்டான்: 36%விசா முறைகேடுகளைத் தடுத்தல் மற்றும் அவுஸ்திரேலியாவின் வீடமைப்பு மற்றும் உட்கட்டமைப்பு வசதிகள் மீது ஏற்படும் அழுத்தங்களைக் குறைக்கும் நோக்கில் அந்நாட்டு குடிவரவுக் கொள்கைகள் பலப்படுத்தப்பட்டுள்ளதே இந்த அதிகரிப்புக்குக் காரணமாகும்.
ஒட்டுமொத்தமாக உயர்கல்வி விசா நிராகரிப்பு வீதம் 30 சதவீதத்தைத் தாண்டியுள்ளதுடன், இது கடந்த இரு தசாப்தங்களில் பதிவான மிக உயர்ந்த மட்டமாகும்.
இலங்கை மாணவர்களின் விருப்பத்திற்குரிய கல்வித் தளமாக விளங்கும் அவுஸ்திரேலியாவின் இந்த மாற்றம், மாணவர்களின் கல்வித் திட்டங்களில் பாரிய தாக்கத்தையும் நிச்சயமற்ற தன்மையையும் ஏற்படுத்தும் என எதிர்பார்க்கப்படுகிறது.
கல்வி ஆலோசகர்களின் கருத்துப்படி, விண்ணப்பதாரர்கள் இப்போது வலுவான நிதி ஆதாரம், தெளிவான கல்விப் பாதை மற்றும் நம்பகமான கல்விக்கு பிந்திய திட்டங்கள் (Post-study plans) போன்ற கடுமையான நிபந்தனைகளை எதிர்கொள்ள வேண்டியிருக்கும்.
அவுஸ்திரேலியா தனது குடிவரவு முறைமையை மறுசீரமைத்து வருவதால், வரும் மாதங்களில் மாணவர் விசா கொள்கைகளில் மேலும் மாற்றங்கள் எதிர்பார்க்கப்படுகின்றன.
