பயிர்ச்செய்கை நோக்கங்களுக்காக குத்தகை அடிப்படையில் வழங்கப்பட்ட போதிலும், உரிய விவசாய நடவடிக்கைகளுக்குப் பயன்படுத்தப்படாத அரசுக்குச் சொந்தமான காணிகளை 135 பேரிடமிருந்து மீளப் பெறுவதற்கு அரசாங்கம் நடவடிக்கை எடுத்து வருவதாக விவசாயம், கால்நடை வளங்கள், காணி மற்றும் நீர்ப்பாசன அமைச்சர் கே.டி. லால் காந்த தெரிவித்துள்ளார்.
அரசாங்கத்திடமிருந்து விவசாயக் காணிகளை குத்தகை அடிப்படையில் பெற்றுக்கொண்டு, அவற்றில் பயிர்ச்செய்கை நடவடிக்கைகளை முன்னெடுக்காத 135 பேர் அடையாளம் காணப்பட்டுள்ளதாகவும், குறித்த காணிகளை மீளப் பெற்று பயனுள்ள விவசாய நடவடிக்கைகளுக்காக ஒதுக்குவதற்கான ஏற்பாடுகள் முன்னெடுக்கப்பட்டு வருவதாகவும் அமைச்சர் குறிப்பிட்டுள்ளார்.
விவசாயம் மற்றும் விவசாய முதலீடுகளுக்காகக் குத்தகைக்கு வழங்கப்பட்டும் நீண்டகாலமாகப் பயன்படுத்தப்படாமல் உள்ள காணிகளை மீளப் பெறுவதற்கான வேலைத்திட்டத்தை நடைமுறைப்படுத்துமாறு சம்பந்தப்பட்ட அதிகாரிகளுக்கு அறிவுறுத்தல்கள் வழங்கப்பட்டுள்ளதாகவும் அவர் தெரிவித்துள்ளார்.
இந்த வேலைத்திட்டத்தின் கீழ், பயன்படுத்தப்படாத காணிகள் அடையாளம் காணப்பட்டு, உரிய குத்தகை ஒப்பந்தங்களில் குறிப்பிடப்பட்டுள்ள நிபந்தனைகள் மற்றும் சட்ட நடைமுறைகளுக்கு அமைவாக மீளப் பெறப்படவுள்ளன.
இவ்வாறு மீளப் பெறப்படும் காணிகள், பயனுள்ள விவசாயத் திட்டங்களை முன்னெடுக்கக்கூடிய தனிநபர்கள் மற்றும் நிறுவனங்களுக்கு மீண்டும் ஒதுக்கீடு செய்யப்படவுள்ளன.
விவசாயக் காணிகளை நீண்டகாலமாகப் பயன்படுத்தாமல் வைத்திருப்பது, நாட்டின் உற்பத்தித் திறனை அதிகரிப்பதற்கான வாய்ப்புகளை இழக்கச் செய்வதாகவும் அமைச்சர் சுட்டிக்காட்டியுள்ளார்.
விவசாய உற்பத்தியை அதிகரித்தல், புதிய முதலீடுகளை ஈர்த்தல் மற்றும் கிராமப்புற மக்களுக்கு மேலதிக வருமான வாய்ப்புகளை உருவாக்குதல் ஆகியவற்றை நோக்கமாகக் கொண்டு இந்த நடவடிக்கை முன்னெடுக்கப்படுவதாக அவர் தெரிவித்துள்ளார்.
அரசுக்குச் சொந்தமான விவசாயக் காணிகளின் உண்மையான பெறுமதி, அவற்றைக் குத்தகை ஒப்பந்தங்களின் கீழ் வைத்திருப்பதில் அல்ல, மாறாக தேசிய உற்பத்தி மற்றும் பொருளாதார அபிவிருத்திக்குப் பங்களிப்பதில் தங்கியுள்ளதாகவும் அமைச்சர் வலியுறுத்தியுள்ளார்.
