-மஸ்கெலியா நிருபர்-
நுவரெலியாவில் அதிக விலைக்கு தண்ணீர் போத்தல்களை விற்ற, ஒரு வணிக நிறுவனத்திற்கு, ஐந்து லட்சம் ரூபாய் அபராதம் விதிக்கப்பட்டது.
நுவரெலியாவில் அதிக விலைக்கு குடிநீர் போத்தல்களை விற்ற ஒரு வணிக நிறுவனத்தில், நுகர்வோர் விவகார அதிகாரசபை சோதனைகளை நடத்தியது.
அதன்படி, நேற்று புதன்கிழமை நுவரெலியா நீதவான் நீதிமன்றத்தில் மேற்படி வணிக நிறுவனத்திற்கு எதிராக வழக்குத் தொடரப்பட்டது
சம்பந்தப்பட்ட நிறுவனம் அதிக விலைக்கு குடிநீர் போத்தல் விற்பனை செய்யப்பட்டதை ஒப்புக்கொண்ட பின்னர், நீதிமன்றம் ஐந்து லட்சம் ரூபாய் அபராதம் விதித்துள்ளது.
மேலும் அதிகபட்ச சில்லறை விலையை விட அதிக விலைக்கு அரிசியை விற்றதற்காக மூன்று வர்த்தகர்களுக்கு அபராதம் விதிக்கப்பட்டுள்ளது.
நுவரெலியா நீதவான் நீதிமன்றத்தில் நேற்று பதினான்கு வழக்குகள் தாக்கல் செய்யப்பட்டதுடன், அவர்களுக்கு நீதிமன்றத்தால் அபராதமும் விதிக்கப்பட்டது.
பேரிடர்களின் போது நுகர்வோர் சமூகத்தைப் பாதுகாக்கும் திட்டத்தின் கீழ், நுவரெலியா மாவட்ட செயலாளர் திருமதி துஷாரி தென்னகோனின் அறிவுறுத்தலின் கீழ், நுகர்வோர் விவகார அதிகாரசபையின் மத்திய மாகாண உதவி இயக்குநர் திரு. கே.ஏ. பிரதீப் களுத்தற ஆராச்சியின் வழிகாட்டுதலின் கீழ், சிரேஷ்ட புலனாய்வு அதிகாரி அமில ரத்நாயக்கவின் வழிகாட்டுதலின் கீழ் இந்த சோதனைகள் மேற்கொள்ளப்பட்டன.
