ஸ்வீடன் பாதுகாப்பு மற்றும் தொழில்நுட்ப நிறுவனமான Saab, விண்வெளித் துறையில் தனது பங்களிப்பை விரிவுபடுத்தும் நோக்கில் SSC Space, OHB Sweden மற்றும் Ericsson நிறுவனங்களுடன் புதிய புரிந்துணர்வு ஒப்பந்தங்களில் கையெழுத்திட்டுள்ளது. விண்வெளி சார்ந்த தொழில்நுட்பங்களையும் சேவைகளையும் ஒருங்கிணைத்து, ஸ்வீடன் மற்றும் நோர்டிக் பிராந்தியத்தின் திறன்களை வலுப்படுத்துவது இதன் நோக்கமாகும்.
இந்த கூட்டாண்மைகள் செயற்கைக்கோள் அமைப்புகள், ஏவுதல் உள்கட்டமைப்பு, தரை நிலைய சேவைகள், விண்வெளிப் பணிகளுக்கான ஆதரவு மற்றும் தகவல் தொடர்பு தொழில்நுட்பங்கள் உள்ளிட்ட பல துறைகளை உள்ளடக்கியுள்ளன. விண்வெளி தொழில்நுட்பங்கள் தொடர்பாடல், வழிசெலுத்தல், கண்காணிப்பு மற்றும் முன்கூட்டிய எச்சரிக்கை போன்ற பாதுகாப்பு நடவடிக்கைகளில் அதிக முக்கியத்துவம் பெற்று வருவதாக Saab தெரிவித்துள்ளது.
SSC Space உடனான ஒப்பந்தத்தின் கீழ், Saab-ன் அமைப்பு ஒருங்கிணைப்பு திறன்களை SSC Space-ன் தரை நிலைய வலையமைப்பு மற்றும் ஏவுதல் உள்கட்டமைப்புடன் இணைப்பது குறித்து ஆராயப்படவுள்ளது. குறிப்பாக வடக்கு ஸ்வீடனில் அமைந்துள்ள Esrange Space Center-ஐ சோதனை, செயல்விளக்கம், செயற்கைக்கோள் ஏவுதல் மற்றும் விண்வெளி நடவடிக்கைகளுக்குப் பயன்படுத்துவது தொடர்பிலும் ஒத்துழைப்பு ஆராயப்படவுள்ளது.
OHB Sweden உடனான ஒத்துழைப்பு செயற்கைக்கோள் அமைப்புகளை Saab-ன் பல்துறை பாதுகாப்புத் தீர்வுகளுடன் ஒருங்கிணைப்பதை நோக்கமாகக் கொண்டுள்ளது. அதேவேளை, Ericsson உடனான கூட்டாண்மையில் தரைவழி மற்றும் விண்வெளி சார்ந்த தகவல் தொடர்பு அமைப்புகளை ஒருங்கிணைத்து, எதிர்கால பாதுகாப்பு மற்றும் சமூக கட்டமைப்புகளின் நம்பகத்தன்மையை மேம்படுத்துவதற்கான வாய்ப்புகள் ஆராயப்படவுள்ளன. இந்த ஒப்பந்தங்களின் நிதி விபரங்கள் வெளியிடப்படவில்லை.
