அமெரிக்காவுடனான வர்த்தகப் போர் நீடிக்கக்கூடும் என்ற சூழ்நிலையில், கனடா அமெரிக்கப் பொருட்களுக்கு விதித்துள்ள 15%, 25% மற்றும் 50% வரையிலான பதிலடி வரிகள் இன்று முதல் அமலுக்கு வந்துள்ளன.
இந்த வரிகள் சுமார் 27.6 பில்லியன் கனேடிய டொலர் மதிப்பிலான அமெரிக்க இறக்குமதிப் பொருட்களை பாதிக்கின்றன. எஃகு, பால் பொருட்கள், மின்சாதனங்கள், விவசாய உபகரணங்கள், காகிதம் மற்றும் மின்னணுப் பொருட்கள் உள்ளிட்ட பல துறைகள் இதில் அடங்குகின்றன.
அமெரிக்கா கனேடியப் பொருட்களுக்கு விதித்துள்ள புதிய 50% வரிகளுக்கு பதிலடியாகவே கனடா இந்த நடவடிக்கையை எடுத்துள்ளது. இரு நாடுகளுக்கும் இடையிலான வர்த்தகப் பேச்சுவார்த்தைகள் கடந்த மாதம் முறிந்த நிலையில், உடனடி உடன்பாடு ஏற்படும் அறிகுறிகள் தென்படவில்லை.
இதனால், இரு நாடுகளின் விநியோகச் சங்கிலிகள் மற்றும் நுகர்வோர் விலைகளில் அழுத்தம் அதிகரிக்கக்கூடும் என பொருளாதார நிபுணர்கள் எச்சரிக்கின்றனர். கனேடிய பிரதமர் மார்க் கார்னி, அமெரிக்காவுடனான தொடர்பு வழிகளை திறந்தே வைத்திருக்க வேண்டும் என வலியுறுத்தியுள்ள போதிலும், இரு தரப்புக்கும் இடையிலான பதற்றம் தொடர்ந்து அதிகரித்து வருகிறது.
