ஜனாதிபதி வேட்பாளர்களுக்கான ஆதரவு வழங்குவது தொடர்பில், அகில இலங்கை மக்கள் காங்கிரஸ் கூடி கலந்துரையாடியதன் பின்னர் உத்தியோகப்பூர்வ தீர்மானம் இன்று அறிவிக்கப்படும் என அதன் தலைவர் ரிசாட் பதியுதீன் தெரிவித்துள்ளார்.
ஐக்கிய மக்கள் சக்தி கூட்டணியின் அங்கத்துவ கட்சி என்ற வகையில் இதுவரையில் எதிர்கட்சி வேட்பாளரான சஜித் பிரேமதாஸவுக்கு ஆதரவு வழங்கவுள்ளதாக தகவல்கள் வெளியாகியுள்ளன.
ஜனாதிபதி பதவிக்கான போட்டி விடயத்தில் பொது எதிர்கட்சி என்ற அடிப்படையில், தங்களுக்குள் பேச்சுவார்த்தை நடத்தி எடுக்கின்ற ஒருமித்த முடிவுடன் ஸ்ரீ லங்கா முஸ்லிம் காங்கிரஸ் தொடர்ந்திருக்கும் என அதன் பொதுச் செயலாளர் நிஸாம் காரியப்பர் தெரிவித்துள்ளார்.
எந்த ஜனாதிபதி வேட்பாளருக்கு ஆதரவளிப்பது என்பது தொடர்பில் இதுவரை இறுதி தீர்மானம் எடுக்கப்படவில்லை எனவும் குறித்த விடயம் தொடர்பில் கட்சி உறுப்பினர்கள் கலந்துரையாடி எதிர்வரும் 19ம் திகதி தீர்மானிக்கப்படும் எனவும் இலங்கை தொழிலாளர் காங்கிரஸின் தலைவர் செந்தில் தொண்டமான் தெரிவித்துள்ளார்
தமிழ் முற்போக்கு கூட்டணி எதிர்கட்சித் தலைவர் சஜித் பிரேமதாஸவுக்கு ஆதரவு வழங்கவுள்ளதாக தெரிவிக்கப்படுகின்றது.
இதேவேளை ஜனாதிபதி தேர்தலுக்கான தேர்தலில் போட்டியிடும் வேட்பாளர்கள் எவரும் உரிய திட்டங்களை முன்வைக்காத காரணமாக, ஜனாதிபதிக்கான வாக்கெடுப்பில் தமது கட்சி வாக்களிக்காது என ஸ்ரீ லங்கா சுதந்திர கட்சியின் தலைவர் மைத்ரிபால சிறிசேன தெரிவித்துள்ளார்.
