ஐக்கிய நாடுகள் சபையின் பொதுச் செயலாளர் அந்தோனியோ குட்டெரெஸ், தனது பதவிக்காலத்தின் இறுதி பொதுச் சபை உரையில், செயற்கை நுண்ணறிவுக்கு (AI) சர்வதேச அளவில் வலுவான கட்டுப்பாடுகளை ஏற்படுத்துவதுடன், உலகில் இடம்பெறும் போர்களை முடிவுக்கு கொண்டுவர வேண்டும் என உலகத் தலைவர்களுக்கு அழைப்பு விடுத்துள்ளார்.
செப்டெம்பர் 22ஆம் திகதி நடைபெற்ற ஐ.நா. பொதுச் சபையின் 81ஆவது கூட்டத்தொடரின் தொடக்க அமர்வில் உரையாற்றிய குட்டெரெஸ், உலகம் தற்போது போர் மற்றும் அமைதி, சமத்துவமின்மை, காலநிலை மாற்றம் மற்றும் செயற்கை நுண்ணறிவு ஆகிய நான்கு முக்கிய சவால்களை எதிர்கொள்வதாக தெரிவித்தார்.
AI தொழில்நுட்பத்தை முன்னெடுத்து வரும் நாடுகள், அதனால் உருவாகக்கூடிய பாதுகாப்பு அபாயங்கள் குறித்த தகவல்களைப் பகிர்ந்து கொள்ளவும், சோதனை மற்றும் மதிப்பீடுகளில் ஒத்துழைக்கவும், பொதுவான பாதுகாப்பு நடவடிக்கைகளை உருவாக்கவும் வேண்டும் என அவர் வலியுறுத்தினார். மேலும், சுயாதீன கண்காணிப்புடன் கூடிய பல்தரப்பு AI அபாய மேலாண்மை கட்டமைப்பு உருவாக்கப்பட வேண்டும் என்றும் அவர் கோரினார்.
உயிர் மற்றும் மரணம் தொடர்பான முடிவுகளை இயந்திரங்களிடம் ஒப்படைக்கக் கூடாது என்றும், கட்டுப்பாடற்ற AI அமைப்புகளை சோதிப்பதற்கான பொருட்களாக குழந்தைகள் ஒருபோதும் பயன்படுத்தப்படக் கூடாது என்றும் குட்டெரெஸ் தெரிவித்தார். தன்னாட்சி முறையில் இயங்கும் கொல்லும் ஆயுதங்களுக்கு எதிராகவும் அவர் எச்சரிக்கை விடுத்தார்.
அதேவேளை, மத்திய கிழக்கு உள்ளிட்ட பகுதிகளில் நீடிக்கும் மோதல்களை முடிவுக்கு கொண்டு வருவதுடன், பொதுமக்கள் மீதான தாக்குதல்களை நிறுத்தி மனிதாபிமான உதவிகள் தடையின்றி சென்றடைய வேண்டும் என்றும் அவர் வலியுறுத்தினார். இஸ்ரேல்–பாலஸ்தீன விவகாரத்தில் இரு நாடுகள் தீர்வுக்கான வாய்ப்பை பாதுகாக்க வேண்டும் என்றும் அவர் அழைப்பு விடுத்தார்.
குட்டெரெஸின் இரண்டாவது ஐந்து ஆண்டு பதவிக்காலம் 2026 டிசம்பர் 31ஆம் திகதி நிறைவடைய உள்ள நிலையில், இந்த உரை பொதுச் செயலாளராக அவர் ஆற்றிய இறுதி பொதுச் சபை உரையாக அமைந்துள்ளது.
