நேபாளத்தில் அண்மையில் ஏற்பட்ட பேரழிவு வெள்ளத்தால் பல நீர்மின் திட்டங்கள் சேதமடைந்து மின்சார உற்பத்தி பாதிக்கப்பட்டுள்ள நிலையில், இந்தியா நாளொன்றுக்கு 18 மணி நேரம் வரை மின்சாரம் வழங்க ஒப்புதல் அளித்துள்ளது.
செப்டம்பர் 13 முதல் டிசம்பர் 31, 2026 வரை இந்த மின்சார ஏற்றுமதிக்கு அனுமதி வழங்கப்பட்டுள்ளது. முசாபர்பூர்–தல்கேபார் 400 கிலோவோல்ட் வழித்தடம் மூலம் 600 மெகாவாட் வரையும், தனக்பூர்–மகேந்திரநகர் வழித்தடம் மூலம் 54 மெகாவாட் வரையும், மொத்தமாக 654 மெகாவாட் வரை நேபாளுக்கு வழங்க முடியும்.
ஆகஸ்ட் 26ஆம் தேதி ஏற்பட்ட திடீர் வெள்ளத்தால் நேபாளத்தின் சுமார் 550 மெகாவாட் மின்சார உற்பத்தித் திறன் பாதிக்கப்பட்டதாக தெரிவிக்கப்பட்டுள்ளது. இதனால் இந்தியாவுக்கான நேபாளத்தின் மின்சார ஏற்றுமதியும் கணிசமாகக் குறைந்துள்ளது. இந்த அவசர மின்சார உதவி, நேபாளத்தின் உள்நாட்டு தேவையை சமாளிப்பதுடன், இரு நாடுகளுக்கும் இடையிலான நீண்டகால எரிசக்தி ஒத்துழைப்பையும் வலுப்படுத்தும் என இந்திய மின்துறை அமைச்சகம் தெரிவித்துள்ளது.
