மட்டக்களப்பு-காத்தான்குடியில் உள்ள பிரபல பெண்கள் பாடசாலைக்கு முன்னால் கேரளா கஞ்சாவை விற்பனை செய்து வந்த நபரொருவர் கைது செய்யப்பட்டுள்ளதாக காத்தான்குடி பொலிஸ் நிலைய போதைவஸ்து ஒழிப்பு பிரிவு பொறுப்பதிகாரி எச்.எம்.சியாமுதீன் தெரிவித்தார்.
இச்சம்பவம் இன்று வியாழக்கிழமை காலை இடம்பெற்றுள்ளது.
காத்தான்குடி பொலிஸ் நிலைய போதைவஸ்து ஒழிப்பு பிரிவிற்கு கிடைக்கப்பெற்ற இரகசிய தகவலையடுத்து, சந்தேக நபரின் தொலைபேசி இலக்கத்தைப் பெற்ற போதை ஒழிப்பு பிரிவு பொறுப்பதிகாரி சந்தேக நபருக்கு அழைப்பை ஏற்படுத்தி ‘கஞ்சா வேணும்’ எனக் கேட்டுள்ளார்.
இதன்போது, சந்தேக நபர் அவரை குறித்த பாடசாலைக்கு முன்னால் வருமாறு தெரிவித்துள்ளார்.
அதனைத்தொடர்ந்து, பொலிஸ் உத்தியோகத்தர்களுடன் குறித்த இடத்திற்கு சென்ற போதை ஒழிப்பு பிரிவு பொறுப்பதிகாரி தலைமையிலான பொலிஸ் குழுவினர் பொலிஸ் உத்தியோகத்தர் ஒருவரை கொண்டு கேரளா கஞ்சாவை வாங்கினர்.
இதன்போது சந்தேகநபர் சுற்றி வளைக்கப்பட்டு கைது செய்யப்பட்டுள்ளார்.
கைது செய்யப்பட்ட சந்தேக நபரிடமிருந்து கேரளா கஞ்சா பக்கற்றுகள் கைப்பற்றப்பட்டுள்ளன.
மேலும், கைது செய்யப்பட்ட நபரை மட்டக்களப்பு நீதவான் நீதிமன்றத்தில் ஆஜர்படுத்த நடவடிக்கைகளை காத்தான்குடி பொலிஸார் முன்னெடுத்துள்ளனர்.
மேலும் பல செய்திகளை அறிந்து கொள்ள மின்னல்24 இணையத்தளத்தை பார்வையிடவும்
