எத்தியோப்பியாவின் வடக்கு டிக்ரே பிராந்தியத்தின் தலைநகர் மெக்கலேவில் உள்ள முக்கிய விமான நிலையத்தை டிக்ரே படைகள் கைப்பற்றியுள்ளதாக உள்ளூர் மற்றும் பாதுகாப்பு வட்டாரங்கள் தெரிவித்துள்ளன. இதையடுத்து Ethiopian Airlines நிறுவனம் டிக்ரே பிராந்தியத்துக்கான தனது விமான சேவைகளை தற்காலிகமாக நிறுத்தியுள்ளது.
அலுலா அபா நேகா விமான நிலையம் புதன்கிழமை அதிகாலை மத்திய அரசின் பொலிஸ் படையினரிடமிருந்து டிக்ரே படைகளின் கட்டுப்பாட்டுக்குள் சென்றதாக உள்ளூர் தகவல்கள் தெரிவிக்கின்றன. விமான நிலையத்தில் மோதல் இடம்பெற்றதா அல்லது உயிரிழப்புகள் ஏற்பட்டுள்ளனவா என்பது தொடர்பில் உடனடி உறுதியான தகவல்கள் வெளியாகவில்லை.
இதனைத் தொடர்ந்து மெக்கலே, அக்சும் மற்றும் ஷைர் ஆகிய நகரங்களுக்கான அனைத்து விமான சேவைகளையும் தற்போதைய டிக்ரே பிராந்திய நிலைமையைக் கருத்தில் கொண்டு நிறுத்தியுள்ளதாக Ethiopian Airlines தெரிவித்துள்ளது. விமான சேவைகள் எப்போது மீண்டும் ஆரம்பிக்கப்படும் என்பது குறித்து நிறுவனம் குறிப்பிட்ட காலக்கெடுவை அறிவிக்கவில்லை.
எத்தியோப்பிய மத்திய அரசுக்கும் Tigray People’s Liberation Front (TPLF)க்கும் இடையிலான உறவுகள் கடந்த சில மாதங்களாக மோசமடைந்து வருகின்றன. இருதரப்பினரும் 2020 முதல் 2022 வரை இடம்பெற்ற கடுமையான உள்நாட்டுப் போருக்குப் பின்னர் 2022 நவம்பரில் சமாதான உடன்பாட்டில் கையெழுத்திட்டிருந்தனர். எனினும், அந்த உடன்பாடு மீறப்பட்டதாக இருதரப்பினரும் பரஸ்பரம் குற்றம்சாட்டி வருகின்றனர்.
இதனிடையே, TPLF கடந்த ஞாயிற்றுக்கிழமை எத்தியோப்பியாவின் பல்வேறு ஆயுதக் குழுக்களுடன் இணைந்து புதிய கூட்டணியை உருவாக்கியதாக அறிவித்திருந்தது. இந்தக் கூட்டணி பிரதமர் அபி அஹ்மத் தலைமையிலான அரசாங்கத்தை பதவியிலிருந்து அகற்றுவதை இலக்காகக் கொண்டுள்ளதாக தெரிவிக்கப்பட்டுள்ளது. இதனால் டிக்ரே பிராந்தியத்தில் மீண்டும் பெரியளவில் மோதல்கள் ஏற்படக்கூடும் என்ற அச்சம் அதிகரித்துள்ளது.
