விநாயகர் சதுர்த்தியை முன்னிட்டு சென்னை கொடுங்கையூர், ஆர்.கே.நகர் மற்றும் கொருக்குப்பேட்டை பகுதிகளில் நடிகரும் தமிழக வெற்றிக் கழகத் தலைவருமான விஜய்யை மையமாகக் கொண்டு உருவாக்கப்பட்ட விநாயகர் சிலைகள் சமூக வலைத்தளங்களில் பெரும் கவனம் பெற்றுள்ளன. விஜய்யின் திரையுலகப் பயணம் முதல் அவரது அரசியல் பயணம் வரையிலான பல்வேறு தோற்றங்களை விநாயகர் சிலைகளில் ரசிகர்கள் வடிவமைத்துள்ளனர்.
இதில் குறிப்பாக, விஜய் நடித்த ‘கில்லி’ திரைப்படத்தில் இடம்பெற்ற கபடி வீரர் வேலு கதாபாத்திரத்தை அடிப்படையாகக் கொண்ட விநாயகர் சிலை ரசிகர்களின் கவனத்தை ஈர்த்துள்ளது. கபடி மைதானத்தில் விளையாடும் பாணியில் இந்த சிலை வடிவமைக்கப்பட்டுள்ளது. 2004ஆம் ஆண்டு வெளியான ‘கில்லி’ திரைப்படத்தில் விஜய் கபடி வீரராக நடித்திருந்தது குறிப்பிடத்தக்கது.
அதேபோல், விஜய் அரசியலில் ஈடுபட்டு தமிழக வெற்றிக் கழகத்தின் தலைவராக செயல்படும் தற்போதைய தோற்றத்தையும் பிரதிபலிக்கும் வகையில் மற்றொரு விநாயகர் சிலை அமைக்கப்பட்டுள்ளது. வெள்ளைச் சட்டை, காக்கி நிற கால்சட்டை மற்றும் கட்சித் துண்டுடன் மக்களிடம் உரையாற்றுவது போன்ற தோற்றத்தில் இந்த சிலை வடிவமைக்கப்பட்டுள்ளது.
இதற்கு அடுத்ததாக, விஜய் முதலமைச்சராக சட்டப்பேரவையில் பேசுவது போன்ற கற்பனைத் தோற்றத்திலும் மற்றொரு விநாயகர் சிலை உருவாக்கப்பட்டுள்ளது. குறிப்பாக விஜய் பயன்படுத்தும் பிரபலமான கை அசைவையும் இந்த சிலையில் பிரதிபலிக்கும் வகையில் வடிவமைப்பு செய்யப்பட்டுள்ளது.
மேலும், தேர்தல் காலத்தில் விஜய் சைக்கிளில் சென்று வாக்களித்த சம்பவத்தை நினைவுபடுத்தும் வகையில், விநாயகர் சைக்கிள் ஓட்டிச் செல்வது போன்ற மற்றொரு வித்தியாசமான சிலையும் கொருக்குப்பேட்டை பகுதியில் உருவாக்கப்பட்டுள்ளது. இந்த சிலைகளைக் காண பொதுமக்களும் விஜய் ரசிகர்களும் திரண்டு வருவதுடன், சிலைகளுடன் புகைப்படங்கள் மற்றும் செல்ஃபிகளை எடுத்துக்கொண்டு சமூக வலைத்தளங்களில் பகிர்ந்து வருகின்றனர்.
திரைப்படக் கதாபாத்திரம், அரசியல் தலைவர், எதிர்கால முதலமைச்சர் என்ற கற்பனைத் தோற்றம் என விஜய்யின் பல்வேறு பரிமாணங்களை விநாயகர் சிலைகளில் இணைத்திருப்பது தற்போது சமூக வலைத்தளங்களில் பேசுபொருளாகியுள்ளது. ரசிகர்களின் படைப்பாற்றலை பலர் பாராட்டி வரும் நிலையில், மத விழாக்களில் சினிமா மற்றும் அரசியல் பிரபலங்களின் உருவங்களைப் பயன்படுத்துவது குறித்தும் சமூக வலைத்தளங்களில் மாறுபட்ட கருத்துகள் வெளியாகி வருகின்றன.
