நுகர்வோர் விவகார அதிகாரசபையினால் மேற்கொள்ளப்பட்ட சோதனை நடவடிக்கையின்போது கைப்பற்றப்பட்ட 1,300-க்கும் மேற்பட்ட காலாவதியான அழகு சாதனப் பொருட்கள், விலை மாற்றப்பட்ட மருத்துவ உபகரணங்கள் மற்றும் சட்டப்படி விலை குறியீடு இல்லாத மருந்துகள் தொடர்பில், பண்டாரவளை நீதவான் நீதிமன்றம் மொத்தமாக 230,000 ரூபா அபராதம் விதித்துள்ளது.
மேலும், கைப்பற்றப்பட்ட பொருட்கள் அனைத்தையும் அழிக்குமாறும் நீதிமன்றம் உத்தரவிட்டுள்ளது.
கடந்த ஆகஸ்ட் 5ஆம் திகதி பண்டாரவளை பகுதியில், நுகர்வோர் விவகார அதிகாரசபையின் பதுளை மாவட்ட அதிகாரிகள் மேற்கொண்ட சோதனையைத் தொடர்ந்து இந்த வழக்கு தொடரப்பட்டது.
சோதனையின்போது, அழகு சாதனப் பொருளின் காலாவதியான 24 பொதிகள் கைப்பற்றப்பட்டன.
அத்துடன், 97 மருத்துவ உபகரணங்களில் ஏற்கனவே குறிப்பிடப்பட்டிருந்த அதிகபட்ச சில்லறை விலைகள் அழிக்கப்பட்டு, அதற்கு பதிலாக அதிக விலைகள் குறிப்பிடப்பட்டிருந்தமை கண்டறியப்பட்டது.
மேலும், பொருட்களின் விலைகளை மாற்றுவதற்குப் பயன்படுத்தப்பட்ட உபகரணங்கள் மற்றும் விலைச் சீட்டுகளும் அதிகாரிகளால் கைப்பற்றப்பட்டன.
இதற்கு மேலதிகமாக, சட்டப்படி குறிப்பிடப்பட வேண்டிய அதிகபட்ச சில்லறை விலை (MRP) குறியீடு இல்லாத 1,180-க்கும் மேற்பட்ட மருந்துப் பொதிகளும் கைப்பற்றப்பட்டுள்ளன.
குற்றச்சாட்டுகளை பிரதிவாதிகள் நீதிமன்றத்தில் ஏற்றுக்கொண்டதைத் தொடர்ந்து, அபராதம் விதிக்கப்பட்டது.
அபராதத்துடன், வழக்குப் பொருட்களாக நீதிமன்றத்தில் சமர்ப்பிக்கப்பட்டிருந்த மருந்துகள், மருத்துவ உபகரணங்கள் மற்றும் அழகு சாதனப் பொருட்கள் அனைத்தையும் முழுமையாக அழிக்குமாறும் நீதவான் உத்தரவிட்டார்.
பொருட்களை கொள்வனவு செய்யும்போது நுகர்வோர் காலாவதி திகதி, குறிப்பிடப்பட்டுள்ள விலை மற்றும் கட்டாயமாக வழங்கப்பட வேண்டிய ஏனைய தகவல்கள் சரியாக உள்ளனவா என்பதை கவனமாக பரிசோதிக்க வேண்டும் என நுகர்வோர் விவகார அதிகாரசபை அறிவுறுத்தியுள்ளது.
காலாவதியான பொருட்களை விற்பனை செய்வது, பொருட்களின் விலைகளை மாற்றுவது அல்லது சட்டப்படி குறிப்பிட வேண்டிய தகவல்களை காட்சிப்படுத்தாமல் இருப்பது போன்ற முறைகேடுகள் தொடர்பில் 1977 என்ற நுகர்வோர் அவசர தொலைபேசி இலக்கத்தின் ஊடாக முறைப்பாடுகளை பதிவு செய்யலாம், என அதிகாரசபை தெரிவித்துள்ளது.
(படம் AI Generated)
