ஐரோப்பிய ஒன்றியம் புகலிட விதிகளை கடுமையாக்கும் : ஐரோப்பிய பாராளுமன்றம் ஒப்புதல்
ஐரோப்பிய ஒன்றியத்தில் இடம்பெயர்வு மற்றும் புகலிட விதிகளை கடுமையாக்கும் பாரிய சீர்திருத்தத்திற்கு பல வருட பேச்சுவார்த்தைகளுக்குப் பிறகு ஐரோப்பிய பாராளுமன்றம் ஒப்புதல் அளித்துள்ளது.
ஐரோப்பிய ஒன்றிய தஞ்சம் மற்றும் இடம்பெயர்வு ஒப்பந்தம் 2015 முதல் செயல்பாட்டில் உள்ள நிலையில் , இந்த புதிய நடைமுறை இன்னும் இரண்டு ஆண்டுகளில் நடைமுறைக்கு வரும். புகலிடச் செயல்முறையை விரைவுபடுத்தவும், ஒழுங்கற்ற குடியேற்றவாசிகளை சொந்த நாடுகளுக்குத் திருப்பி அனுப்புவதை அதிகரிக்கும் வகையில் இது வடிவமைக்கப்பட்டுள்ளது.
இந்தநிலையில் கடந்த 2023 ஆண்டு சுமார் 380,000 பேர் ஐரோப்பிய ஒன்றியத்தின் எல்லைகளை சட்டவிரோதமாக கடந்து சென்றுள்ளனர் இது 2016 க்குப் பின்னரான அதிக எண்ணிக்கையாகும் என அறிவிக்கப்பட்டுள்ளது.
இந்த புதிய ஒப்பந்தம் உறுப்பு நாடுகளுக்கு இடையே உள்ள கட்டாய ஒற்றுமையை நெகிழ்வுத் தன்மையுடன் இணைத்ததாக இருக்கம் என ஐரோப்பிய ஒன்றியம் கூறியது. சில ஐரோப்பிய ஒன்றிய நாடுகள் ஒப்பந்தத்தின் சில பகுதிகளை எதிர்த்தாலும், பெரும்பான்மை வாக்கெடுப்பின் கீழ் ஏப்ரல் இறுதியில் முழு ஒப்புதலைப் பெறும் என்று எதிர்பார்க்கப்படுகிறது.
இந்த நிலையில் ஏற்றுக்கொள்ளப்படுவதற்கான குறைந்த வாய்ப்புகள் கொண்ட புகலிடக் கோரிக்கைகள், விண்ணப்பதாரரை ஐரோப்பிய ஒன்றிய எல்லைக்குள் அனுமதிக்காமல், விரைவாக ஆராயப்பட வேண்டும் என்றும் ஒப்பந்தம் கூறுகிறது.
புகலிடக் கோரிக்கைகளை அதிகபட்சமாக 12 வாரங்களுக்குள் கையாள்வதையும் இந்த ஒப்பந்தம் நோக்கமாகக் கொண்டுள்ளது. புகலிடம் நிராகரிக்கப்பட்டால், அதே காலத்திற்குள் புகலிடக் கோரிக்கையாளர்கள் வலுக்கட்டாயமாக அவர்களது சொந்த நாட்டிற்கு திருப்பி அனுப்பப்பட வேண்டும் எனவும் ஒப்பந்தம் கூறுகிறது.
மேலும் புலம்பெயர்ந்தோர் ஏழு நாட்களுக்குள் கடுமையான முன் நுழைவுத் திரையிடல் நடைமுறைக்கு உட்படுத்தப்படுவார்கள், இதில் அடையாளம் மற்றும் உடல்நலம் மற்றும் பாதுகாப்பு சோதனைகள் அடங்கும்.
ஜேர்மன் சான்சிலர் ஓலாஃப் ஸ்கோல்ஸ் இது ஒரு “வரலாற்று, தவிர்க்க முடியாத படி” என்று பாராட்டினார் மற்றும் ஐரோப்பிய பாராளுமன்றத்தின் தலைவர் ராபர்ட்டா மெட்சோலா, இது “ஒற்றுமை மற்றும் பொறுப்புக்கு இடையே சமநிலையை” ஏற்படுத்தியது எனவும் தெரிவித்துள்ளார்.
“எந்தவொரு இடம்பெயர்வு உடன்படிக்கையையும் பொருட்படுத்தாமல்” ஒழுங்கற்ற குடியேற்றவாசிகளை எடுக்கமாட்டோம் என்று ஹங்கேரி உறுதியளித்துள்ளது, மேலும் போலாந்து பிரதமர் டொனால்ட் டஸ்க் சில புகலிடக் கோரிக்கையாளர்களை உள்வாங்கும் அல்லது முன்னணி மாநிலங்களுக்கு ஐரோப்பிய ஒன்றிய நிதியில் செலுத்தும் வழிமுறையை “ஏற்றுக்கொள்ள முடியாதது” என்று நிராகரித்துள்ளார்.
மேலும் பல செய்திகளை அறிந்து கொள்ள மின்னல்24 இணையத்தளத்தை பார்வையிடவும்
