-கிண்ணியா நிருபர்-
யாழ்ப்பாணம் இந்திய பொதுத் தூதரகம்,இன்று இந்தியாவின் 79 ஆது சுதந்திர தினத்தை தேசப்பற்று உணர்வும், மரியாதையும் நிறைந்த முறையில் கொண்டாடியது.
இந் நிகழ்வு, பொதுத் தூதர் திரு. எஸ். சாய் முரளி, இலங்கை பாதுகாப்புப் படைகள் தளபதி மேஜர் ஜெனரல் கே.ஏ.என். ரசிக குமாரா ஆகியோர் இணைந்து, யாழ்ப்பாணம், பலாலையில் அமைந்துள்ள இந்திய அமைதிப் பாதுகாப்புப் படையினர் (IPKF) நினைவுச் சின்னத்தில் மலர்தூவி, இந்திய அமைதிப் பாதுகாப்புப் படையினர் செய்த உன்னத தியாகத்தை நினைவுகூருவதன் மூலம் தொடங்கப்பட்டது.
இதையடுத்து, பொதுத் தூதரக வளாகத்தில் தேசியக் கொடி ஏற்றப்பட்டு, இந்தியக் குடியரசுத் தலைவர் திருமதி திரௌபதி முர்மு அவர்கள் நாட்டிற்கு வழங்கிய உரையின் சில பகுதிகள் வாசிக்கப்பட்டது.
தனது உரையில், குடியரசுத் தலைவர், அடிப்படை வசதிகள், அறிவியல், சுகாதாரம், செயற்கை நுண்ணறிவு போன்ற புதிய தொழில்நுட்பங்கள் உள்ளிட்ட துறைகளில் இந்தியா பெற்ற முன்னேற்றங்களை வலியுறுத்தினார்.
இந்திய பொருளாதாரம் நிலையான வளர்ச்சியுடன் வலுவாக முன்னேறி வருவதாகவும், ஜம்மு & காஷ்மீர் மாநிலச் சட்டமன்றத் தேர்தல்கள் வெற்றிகரமாக நடைபெற்றது ஜனநாயகத்தை வலுப்படுத்தும் ஒரு முக்கிய மைல்கல் எனவும் குறிப்பிட்டார்.
மேலும், பயங்கரவாதத்துக்கு எதிராக உலகளாவிய ஒற்றுமை அவசியம் எனவும், “ஆபரேஷன் சிந்தூர்” இந்தியாவின் தயார்தன்மையையும் மக்களை பயங்கரவாதத்தின் அச்சுறுத்தலிலிருந்து பாதுகாக்கும் உறுதியையும் நிரூபிப்பதாகவும் கூறினார்.
இந்தியர்கள், இந்திய நட்புகள் மற்றும் நல்வாழ்த்துநர்கள் உள்பட சுமார் 150 பேர் இந்நிகழ்வில் பங்கேற்றனர். தேசப்பற்று பாடல்கள் மற்றும் இளஞ்சார்புகள் வழங்கப்பட்டு நிகழ்வு நிறைவுற்றது.
