தித்வா சூறாவளிக்குப் பின்னர் இலங்கை முழுவதும் நடைபெற்று வரும் நடவடிக்கைகளை ஆதரிக்கும் வகையில் ஆசிய அபிவிருத்தி வங்கி (ADB) இலங்கைக்கு 3 மில்லியன் அமெரிக்க டொலர் பேரிடர் நிவாரண மானியத்தை அங்கீகரித்துள்ளது.
இதேநேரம் சீரற்ற வானிலையால் பாதிக்கப்பட்ட தாய்லாந்து மற்றும் வியட்நாமுக்கு தலா 2 மில்லியன் அமெரிக்க டொலரை ஆசிய அபிவிருத்தி வங்கி அங்கீகரித்துள்ளது.
அந்தந்த அரசாங்கங்களின் ஆதரவைக் கோரியதைத் தொடர்ந்து, ஆசிய அபிவிருத்தி வங்கியின் தலைவர் மசாடோ கண்டா இந்த அறிவிப்பை வெளியிட்டுள்ளார் .
இந்த பேரழிவு தரும் வெள்ளத்தால் ஏற்பட்ட துன்பங்களால் தான் மிகவும் வருத்தமடைந்தேன்” என கண்டா கூறியுள்ளார் .
இலங்கை, தாய்லாந்து மற்றும் வியட்நாம் அரசாங்கங்களுக்கும் மக்களின் உயிர்களைக் காப்பாற்றவும் சமூகங்களை மீண்டும் கட்டியெழுப்பவும் ADB உதவி வழங்கும் என்பதில் உறுதியாக இருப்பதாகவும் அவர் குறிப்பிட்டுள்ளார் .
இந்த பயங்கரமான நிகழ்வுகளால் பாதிக்கப்பட்டவர்களுக்கு தங்குமிடம், ஆறுதல் மற்றும் நம்பிக்கையை வழங்க அரசாங்கங்களுடன் விரைவாகவும் ஒத்துழைப்புடனும் தாங்கள் பணியாற்றுவோம் எனவும் ஆசிய அபிவிருத்தி வங்கியின் தலைவர் தெரிவித்துள்ளார் .
இந்த மானியங்கள் அவசர மற்றும் மனிதாபிமான முயற்சிகளை ஆதரிக்கும், மேலும் இயற்கை பேரிடர்களால் தூண்டப்பட்ட பாரிய பேரழிவுகளுக்குப் பின்னர் உடனடியாக உயிர்காக்கும் நோக்கங்களுக்காக வளரும் உறுப்பு நாடுகளுக்கு விரைவான மானியங்களை வழங்கும் ஆசிய பசிபிக் பேரிடர் மீட்பு நிதியிலிருந்து (APDRF) வழங்கப்படுகிறது.
இலங்கை மற்றும் பல தென்கிழக்கு ஆசிய நாடுகளில் வெள்ளம் பெருமளவில் உயிர் இழப்பு மற்றும் சொத்து மற்றும் உள்கட்டமைப்புக்கு சேதத்தை ஏற்படுத்தியுள்ளது.
