முட்டை உற்பத்தியாளர்கள் நிலையான விலையில் முட்டைகளை வழங்கினால் 53 ரூபாவுக்கு முட்டைகளை விற்பனை செய்ய முடியும் என அகில இலங்கை முட்டை வர்த்தக சங்கத்தின் செயலாளர் அனுரசிறி மாரசிங்க தெரிவித்துள்ளார்.
தற்போது உற்பத்தியாளர்கள் வெவ்வேறு விலையில் முட்டைகளை வியாபாரிகளுக்கு வழங்குகின்றனர்.
உற்பத்திச் செலவு மற்றும் இலாபத்தை வைத்து, வெள்ளை முட்டை 49 ரூபாவிற்கும், சிவப்பு முட்டை 50 ரூபாவிற்கும் வியாபாரிகளுக்கு வழங்க உற்பத்தியாளர்கள் நடவடிக்கை எடுத்தால், நுகர்வோருக்கு முட்டை நியாயமான விலையில் கிடைக்கும், என அகில இலங்கை முட்டை வியாபாரிகள் சங்கத்தின் செயலாளர் அனுரசிறி மாரசிங்க சுட்டிக்காட்டியுள்ளார்.
பண்டிகை காலம் என்பதால், முட்டைக்கு அதிக தேவை இருந்தாலும், சந்தையில் முட்டை தட்டுப்பாடு ஏற்பட்டுள்ளதால், கிடைக்கும் முட்டை, 60 ரூபாய் முதல், 70 ரூபாய் வரை விற்கப்படுகிறது.
நுகர்வோர் விவகார அதிகாரசபை முட்டைக்கான அதிகபட்ச சில்லறை விலையாக 43 முதல் 45 ரூபா வரை நிர்ணயித்துள்ளது.
எவ்வாறாயினும், கடந்த வாரம் மேன்முறையீட்டு நீதிமன்றம் பிறப்பித்த இடைக்கால உத்தரவுடன், சில்லறை விலை குறிப்பிடும் வர்த்தமானி இடைநிறுத்தப்பட்டது.
இதன் காரணமாக அதிக விலைக்கு முட்டை விற்பனை செய்பவர்களுக்கு எதிராக சட்டத்தை அமுல்படுத்தும் அதிகாரத்தையும் நுகர்வோர் அதிகார சபை இழந்துள்ளது.
