நாட்டில் சூறாவளியைத் தொடர்ந்து ஏற்பட்ட வெள்ளம் மற்றும் மண்சரிவுகளில், கம்பளை பிரதேசத்தில் மாத்திரம் 1,000 பேர் உயிரிழந்துள்ளதாக வெளியான செய்திகளை கண்டி மாவட்டச் செயலாளர் (Kandy District Secretary) முழுமையாக நிராகரித்துள்ளார்.
உயிரிழப்பு விபரங்களில் உள்ள முரண்பாடுகள் குறித்து நாடாளுமன்ற உறுப்பினர் இராசமாணிக்கம் சாணக்கியன் கேள்வி எழுப்பியபோது, பல நாடாளுமன்ற உறுப்பினர்களுடன் நடந்த சந்திப்பின்போதே மாவட்ட செயலாளர் இந்த அறிக்கையை வெளியிட்டார்.
அனர்த்தங்கள் ஏற்படும்போது மீட்பு மற்றும் சடலங்களை மீட்கும் நடவடிக்கைகள் தொடர்ந்து நடைபெறுவதால், உயிரிழப்பு எண்ணிக்கையில் முரண்பாடுகள் ஏற்படுவது வழமைதான் என்பதை மாவட்டச் செயலாளர் ஒப்புக்கொண்டார்.
மேலும், வீதிகள் சேதமடைந்ததால் தொலைதூரக் கிராமங்களுக்கு உணவு மற்றும் அத்தியாவசியப் பொருட்களை வழங்குவதில் உள்ள மட்டுப்படுத்தப்பட்ட அணுகல் குறித்த கவலைகளுக்கும் அதிகாரிகள் பதிலளித்தனர்.
வீதிகளை விரைவில் சீர்செய்து, அணுகலை மீட்கும் முயற்சிகள் துரிதப்படுத்தப்பட்டு வருவதாக அதிகாரிகள் தெரிவித்தனர்.
இந்தக் கூட்டத்தில் மனோ கணேசன், திலித் ஜயவீர மற்றும் சுஜீவ சேனசிங்க உள்ளிட்ட பலரும் கலந்து கொண்டனர்.
