இந்தியாவின் பெங்களூருவில் உணவு விநியோக நிறுவனமொன்றின் செயலி ஊடாக உணவகமொன்றிடமிருந்து பெற்றுக்கொண்ட உணவில் இறால் துண்டுகள் இருந்தமைக்காக, சைவ உணவுப் பிரியர் ஒருவருக்கு ஒரு இலட்சம் இந்திய ரூபாய்களை இழப்பீடாக செலுத்த உத்தரவிடப்பட்டுள்ளது.
உணவில் இறால் துண்டுகள் இருந்ததையடுத்து, ஏற்பட்ட மன உளைச்சலுக்காகவும், நுகர்வோர் உரிமைகளைப் புறக்கணித்தமைக்காகவும், குறித்த விநியோக நிறுவனம் மற்றும் சம்பந்தப்பட்ட உணவகம் ஆகிய இரண்டும் சேர்ந்து குறித்த இழப்பீட்டை வழங்க வேண்டும் என பெங்களூரு நகர்ப்புற மாவட்ட நுகர்வோர் குறைதீர்க்கும் ஆணைக்குழு தீர்ப்பளித்தது.
2024 ஆம் ஆண்டின் ஜுலை மாதம் நடந்த இந்த சம்பவம், கடும் சைவப் பழக்கம் கொண்ட நபருக்கு மனரீதியாக மிகுந்த வேதனையை அளித்ததால், அவர் 2 லட்சம் ரூபாய் இழப்பீடு கோரி முறைப்பாடு தாக்கல் செய்தார்.
வழக்கை விசாரித்த ஆணைக்குழு, உணவியல் கட்டுப்பாடுகளைப் புறக்கணித்து அசைவ உணவை வழங்குவது ‘சாதாரணமாக எடுத்துக்கொள்ள முடியாது’ எனக் கடுமையாகக் கண்டித்ததுடன், இரு நிறுவனங்களுக்கும் சம பொறுப்பு இருப்பதாகத் தெரிவித்தது.
அதன்படி, இந்த மன உளைச்சலுக்காக 50 ஆயிரம் ரூபாவும் வழக்குச் செலவுகளுக்காக 5 ஆயிரம் ரூபாவும் குறித்த உணவின் (சேண்ட்விச்) விலையில் ஆண்டுக்கு 12% ஐ சேர்த்து ஒரு லட்சம் இந்திய ரூபாய் இழப்பீடு வழங்கவும் உத்தரவிடப்பட்டது.
