இலங்கையில் அதிகரித்து வரும் வீதி விபத்துகள் மற்றும் உயிரிழப்புகளின் எண்ணிக்கையைக் குறைக்கும் நோக்குடன், புதிய 2 ஆண்டுக்கான வீதிப் பாதுகாப்பு செயற்திட்டம் ஒன்றுக்கு இலங்கை அரசாங்கம் ஒப்புதல் அளித்துள்ளது.
காவல்துறை தரவுகளின்படி, 2020 மற்றும் 2024 ஆண்டுகளுக்கு இடையில் 1,18,697 வீதி விபத்துகள் பதிவாகியுள்ளன.
இதில் 12,322 உயிரிழப்புகள் ஏற்பட்டுள்ளதாகத் தெரிவிக்கப்பட்டுள்ளது.
இதன்படி வருடாந்த இறப்பு விகிதம் 10,000 பேருக்கு 11.2ஐ எட்டியுள்ளது.
இது தற்போதைய உலகளாவிய நடவடிக்கை தசாப்தத்திற்கான (2021–2030) ஐக்கிய நாடுகள் சபையின் பரிந்துரைக்கப்பட்ட பாதுகாப்பு வரம்பை மீறியுள்ளது.
பாதுகாப்பு ஏற்பாடுகள் இல்லாத தொடருந்து கடைவாயில்களில் ஏற்படும் அபாயங்களையும் இந்தத் திட்டம் கவனத்தில் எடுத்துள்ளது.
கடந்த சில ஆண்டுகளில் இதனால் சுமார் 400 விபத்துகள் ஏற்பட்டுள்ளன.
போக்குவரத்து, நெடுஞ்சாலைகள் மற்றும் நகர்ப்புற மேம்பாட்டுக்கான பதில் அமைச்சர் சமர்ப்பித்த வீதிப் பாதுகாப்பு செயல் திட்டத்தை (2025–2026) அமைச்சரவை அனுமதித்துள்ளது.
இது, வீதி உட்கட்டமைப்பை மேம்படுத்துதல், வாகன விதிமுறைகளை வலுப்படுத்துதல் மற்றும் அனைத்துக் குடிமக்களுக்கும் பாதுகாப்பான வீதிப் பயன்பாட்டை ஊக்குவித்தல் ஆகியவற்றில் கவனம் செலுத்துகிறது.
