-மஸ்கெலியா நிருபர்-
அசல் மொடல்களில் இருந்து மாற்றியமைக்கப்பட்டு, சட்டவிரோதமாக மற்ற வாகனங்களின் பாகங்களுடன் இணைக்கப்பட்டதாக சந்தேகிக்கப்படும் இரண்டு ஜீப்புகள், நோர்வூட் பொலிஸ் போக்குவரத்துப் பிரிவின் அதிகாரிகளால் கடந்த 14 ஆம் தேதி கைப்பற்றப்பட்டன.
இவ்விடயம் தொடர்பில் நோர்வூட் பொலிஸ் அதிகாரி ஒருவர் தெரிவிக்கையில்,
அப்பகுதியில் பொதுமக்களிடமிருந்து பெறப்பட்ட தகவல்களின் அடிப்படையில் நடத்தப்பட்ட விசாரணையின் போது, அசல் மொடல்களில் இருந்து மாற்றியமைக்கப்பட்டு, மற்ற வாகனங்களிலிருந்து அகற்றப்பட்ட பாகங்களுடன் இணைக்கப்பட்டு மாற்றியமைக்கப்பட்டதாக சந்தேகிக்கப்படும் இரண்டு ஜீப்புகள் கடந்த 14 ஆம் தேதி கைப்பற்றப்பட்டதாக தெரிவித்தார்.
இந்த இரண்டு ஜீப்புகளும் மற்ற வாகனங்களிலிருந்து அகற்றப்பட்ட பாகங்களைப் பயன்படுத்தி மாற்றியமைக்கப்பட்டதா என்பதை உறுதிப்படுத்த விசாரணைக்காகவும் அறிக்கைக்காகவும் இரண்டு ஜீப்புகளையும் நுவரெலியா மோட்டார் வாகன ஆய்வாளரிடம் சமர்ப்பிக்க நடவடிக்கை எடுக்கப்பட்டுள்ளதாகவும், ஹட்டன் பொலிஸ் அத்தியட்சகர் பிரதீப் வீரசேகரவின் அறிவுறுத்தலின் பேரில் நோர்வூட் பொலிஸார் இது தொடர்பாக விரிவான விசாரணைகளைத் தொடங்கியுள்ளனர் என்றும் அதிகாரி மேலும் தெரிவித்தார்.
