மட்டக்களப்பு ஊறணி பகுதியில் வீடு ஒன்றில் நுழைந்த நபர் ஒருவர் வயோதிப பெண்ணின் கழுத்தில் கத்தியை வைத்து மிரட்டி கழுத்தில் இருந்த 16 பவுண் தாலிக் கொடியை அறுத்து கொள்ளையடித்து அங்கிருந்த சைக்கிளை திருடிக் கொண்டு தப்பி ஓடியுள்ளார்.
நேற்று வியாழக்கிழமை அதிகாலை இடம்பெற்ற இச்சம்பவத்தில் காயமடைந்த வயோதிப பெண் வைத்தியசாலையில் அனுமதிக்கப்பட்டுள்ளதாக, கொக்குவில் பொலிஸார் தெரிவித்தனர்.
கொக்குவில் பொலிஸ் பிரிவிலுள்ள ஓவசியர் வீதி சின்ன ஊறணி பகுதியிலுள்ள வீடு ஒன்றில் தாதியர் உத்தியோகத்தர் சேவையில் இருந்து ஓய்வு பெற்ற 65 வயதுடைய வயோதிப பெண்ணும் அவரது கணவரும் வாழ்ந்து வருகின்றனர்.
வழமைபோல சம்பவதினமான வியாழக்கிழமை அதிகாலை 4.00 மணியளவில் எழுந்து காலைக் கடன்களை முடித்துக் கொண்டு அறையின் கதவை சாத்திவிட்டு இறைவழிபாட்டில் ஈடுபட்டுக் கொண்டிருந்தபோது அங்கு கதவினை திறந்து ஒருவர் நிற்பதை கண்டு கணவர் என நினைத்து அவரை அழைத்துள்ளார்ஆனால் சத்தம் எதுவும் இல்லை .
இதனையடுத்து அறையின் மின்விளக்கை ஒளிரவிட்ட போது அங்கு அரை காற்சட்டையுடன் நபர் ஒருவர் இடுப்பில் இருந்து கத்தி ஒன்றை எடுத்து கொண்டுஅருகில் வந்து கத்தியை குறித்த பெண்ணின் கழுத்தில் வைத்து கழுத்தில் இருந்த 16 பவுண் தாலிக்கொடியை இழுந்து அறுத்து கொண்டு அவரை கட்டிலில் தள்ளி வீழ்த்திவிட்டு அங்கிருந்து தப்பி ஓடியுள்ளார்.
அதனையடுத்து அவர் சத்தம் போட்டதையடுத்து கணவர் வந்து காயமடைந்த அவரை வைத்தியசாலையில் அனுமதித்தார்.
தப்பி ஓடிய குறித்த நபர் அங்கு நிறுத்தி வைத்திருந்த ஒரு வாரத்துக்கு முன்னர் வாங்கிய புதிய சைக்கிளை திருடிக் கொண்டு ஓடியுள்ளதாகவும் மேலும் அருகிலுள்ள வீடுகளில் வெளியில் இருந்த மோட்டார் சைக்கிள் தலைகவசம் உள்ளிட்ட மற்றும் சில பொருட்களை திருடிச் சென்றுள்ளதாக ஆரம்பகட்ட விசாரணையில் தெரியவந்துள்ளதாகவும் பொலிஸார் தெரிவித்தனர்.
மேலதிக விசாரணைகளை கொக்குவில் பொலிஸார் மேற்கொண்டு வருகின்றனர்.
