இலங்கை ரயில்வே திணைக்களத்தின் ரயில்வே முகாமையாளர் பதவிக்கு ஆண்கள் மட்டுமே விண்ணப்பிக்கலாம் என வெளியிடப்பட்ட வர்த்தமானி அறிவிப்பு, பெண்களின் அடிப்படை உரிமைகளை மீறுவதாகக் கூறி, இரு பெண்கள் தாக்கல் செய்த மனுக்களை விசாரிக்க உயர் நீதிமன்றம் அனுமதி அளித்துள்ளது.
அயேஷானி ஜயவர்தன மற்றும் சுரேஷ் விதுஷா ஆகியோர் தாக்கல் செய்த அடிப்படை உரிமை மனுக்களை, நீதியரசர்கள் ஏ.எச்.எம்.டி. நவாஸ், பிரியந்த பெர்னாண்டோ மற்றும் சம்பத் விஜேரத்ன ஆகியோர் கொண்ட அமர்வு இன்று ஏற்கும் முடிவை எடுத்தது.
மனுதாரர்கள் சார்பில் ஆஜரான சட்டத்தரணி நுவான் போபேகே, ஜூன் 13ஆம் திகதி வெளியான வர்த்தமானியில், 106 வெற்றிடங்களை நிரப்புவதற்கான அழைப்பில், பிற தகுதிகளுடன் ஆண்கள் மட்டுமே விண்ணப்பிக்கலாம் என குறிப்பிடப்பட்டுள்ளதாக நீதிமன்றத்தில் வலியுறுத்தினார்.
