கிண்ணியா – குறிஞ்சாக்கேணி பாலத்திற்கு 75 மில்லியன் ரூபாய் செலவில் புதிய படகு சேவை ஆரம்பம் செய்யும் நிகழ்வில் பெகோ இயந்திரம் சரிந்து நீரில் விழுந்துள்ளதாக தெரிவிக்கப்பட்டுள்ளது.
கிண்ணியாவுக்கும் – குறிஞ்சாக்கேணிக்கும் இடையிலான படகுப் பாதை சேவை இன்று திங்கட்கிழமை உத்தியோகபூர்வமாக ஆரம்பிக்கப்பட்ட போதே இச் சம்பவம் இடம் பெற்றுள்ளது.
வெளிவிவகார மற்றும் வெளிநாட்டு வேலை வாய்ப்புகள் பிரதி அமைச்சர் அருண் ஹேமச்சந்திரா இந்த சேவையை ஆரம்பித்து வைத்தார்.
தற்போது குறிஞ்சாக்கேணிப் பால நிர்மாணப் பணிகள் நடைபெற்று வருவதனால், பொது மக்களின் நன்மை கருதி இந்தப் படகுச் சேவை தற்காலிகமாக ஆரம்பிக்கப்பட்டுள்ளது.
இரண்டு வருடங்களில் பாலத்தின் முழுமையான கட்டட நிர்மாண வேலைகள் நிறைவடையவுள்ள நிலையில், அதுவரைக்கும் இந்தப் படகுப் பாதையின் சேவை செயற்பட உள்ளது.
இந்த தற்காலிக படகுப் பாதைக்கும், அதன் பராமரிப்புச் செலவிற்கும் இரண்டு வருடங்களுக்கு அரசாங்கத்தினால் 75 மில்லியன் ரூபாய் நிதி ஒதுக்கீடு செய்யப்பட்டுள்ளது.
இதேவேளை, 2021ஆம் ஆண்டு எட்டு நபர்கள் பாதுகாப்பற்ற படகு சேவை மூலமாக உயிரிழப்பு சம்பவமும் ஏற்பட்டுள்ளன.
புதிய அரசாங்கம் ஒரு வருட காலமே பூர்த்தி அடைந்த நிலையில், கிண்ணியா – குறிஞ்சாக்கேணி ஆற்றுக்கு புதிய பாலம் அமைப்பதற்காக 1200 மில்லியன் ரூபாய் நிதியை ஒதுக்கீடு செய்துள்ளதுடன், தற்போது பாலத்துக்கான நிர்மாண வேலைகள் ஆரம்பிக்கப்பட்டுள்ளன.
இந்த நிகழ்வில் வெளிநாட்டு வேலை வாய்ப்புகள் பிரதி அமைச்சர் அருண் ஹேமச்சந்திரா, தேசிய மக்கள் சக்தியின் திருகோணமலை பாராளுமன்ற உறுப்பினர் ரொசன் அக்மீம, தேசிய மக்கள் சக்தியின் கிண்ணியா பிரதேச அமைப்பாளர் எம்.ஈ.எம். ராபிக் உட்பட கிண்ணியா பிரதேச மற்றும் நகர சபைகளின் தேசிய மக்கள் சக்தியின் உறுப்பினர்கள் பலரும் கலந்து கொண்டனர்.
கிண்ணியா நகர சபை மற்றும் பிரதேச சபையை இணைக்கும் குறித்த பால அங்குராப்பண நிகழ்வில் தவிசாளர்களுக்கு அழைப்பு விடுக்கப்படவில்லை என தெரியவந்துள்ளது.
