-மஸ்கெலியா நிருபர்-
பல ஆண்டுகளாக பாழடைந்து கைவிடப்பட்ட நிலையில் இருந்த, ஹட்டனில் உள்ள பழைய சந்தை வளாகத்தை (ராணா சந்தை), உடனடியாகப் புதுப்பித்து பொதுமக்களுக்குக் கிடைக்கச் செய்ய, ஹட்டன் டிக்கோயா நகர சபை நடவடிக்கை எடுத்துள்ளது.
இதன் கீழ், சந்தையை நவீனமயமாக்குவதற்கான ஆரம்பப் பணிகள், நேற்று பிற்பகல், ஹட்டன் டிக்கோயா நகர சபை முதல்வர் அசோக கருணாரத்ன மற்றும் நகர சபை அதிகாரிகளின் பங்கேற்புடன் தொடங்கியது.
பழைய சந்தை வளாகத்தில் கடைகளை வைத்திருந்த சில வணிகர்கள், சேமிப்பு அறைகளாக இடங்களை வாடகைக்கு எடுத்து, நடைபாதைகளில் வர்த்தகம் செய்து வருவது அவதானிக்கப்பட்டது.
இது நகரத்தில் பாதசாரிகளுக்கு பெரும் தடையாக மாறியுள்ளது, நடைபாதைகளை மறித்து வியாபாரம் செய்பவர்களை அகற்றவும், நகரத்தில் நெரிசலைக் குறைக்கவும் மேயர் மற்றும் அதிகாரிகள் நடவடிக்கை எடுத்தனர்.
ஊடகங்களிடம் பேசிய முதல்வர் அசோக கருணாரத்ன,
தற்போது பாழடைந்த நிலையில் உள்ள பழைய சந்தையில் உள்ள அனைத்து கடைகளும் உடனடியாகப் புதுப்பிக்கப்படும் என்று கூறினார்.
பணிகள் முடிந்ததும், அந்தப் பகுதி மீன் மற்றும் இறைச்சி வர்த்தகத்திற்காக ஒதுக்கப்படும் என்றும், நடைபாதைகளில் எந்த வர்த்தகமும் அனுமதிக்கப்படாது, என்றும் அவர் மேலும் கூறினார்.
