ஹொலிவுட்டில் பெரும் எதிர்பார்ப்பை ஏற்படுத்தியுள்ள ‘வேர்ல்ட் வார் Z (World War Z)’ திரைப்படத்தின் நீண்டகாலமாக எதிர்பார்க்கப்பட்ட தொடர்ச்சிப் படத்தில் பிரபல நடிகர் பிராட் பிட் மீண்டும் நடிக்கவுள்ளார். 2013ஆம் ஆண்டு வெளியான முதல் பாகத்திற்குப் பின்னர் 13 ஆண்டுகள் கடந்துள்ள நிலையில், அதன் இரண்டாம் பாகம் தற்போது தீவிரமாக முன்னெடுக்கப்படுகிறது.
முதல் பாகத்தில் ஐக்கிய நாடுகள் சபையின் முன்னாள் பணியாளரான ஜெர்ரி லேன் கதாபாத்திரத்தில் நடித்த பிராட் பிட், தொடர்ச்சிப் படத்திலும் அதே கதாபாத்திரத்தில் மீண்டும் தோன்றவுள்ளார். ‘ஆல் குவைட் ஆன் தி வெஸ்டர்ன் பிரண்ட் (All Quiet on the Western Front)’ மற்றும் ‘கான்கிளேவ் (Conclave)’ ஆகிய திரைப்படங்களை இயக்கிய எட்வர்ட் பெர்கர், புதிய ‘World War Z’ படத்தை இயக்க ஒப்பந்தமாகியுள்ளார். டென்னிஸ் கெல்லி திரைக்கதையை எழுதவுள்ளார்.
புதிய திரைப்படத்தின் கதைக்களம் மற்றும் வெளியீட்டு தேதி குறித்த தகவல்கள் இதுவரை அதிகாரப்பூர்வமாக வெளியிடப்படவில்லை. பிராட் பிட், டிடி கார்ட்னர் மற்றும் ஜெரமி கிளைனர் ஆகியோர் தங்களது Plan B தயாரிப்பு நிறுவனத்தின் மூலம் படத்தைத் தயாரிக்கவுள்ளதாக தெரிவிக்கப்பட்டுள்ளது. எட்வர்ட் பெர்கரும் நிர்வாகத் தயாரிப்பாளராக இணைந்துள்ளார்.
மேக்ஸ் புரூக்ஸ் எழுதிய 2006ஆம் ஆண்டு வெளியான ‘வேர்ல்ட் வார் Z (World War Z): அன் ஓரல் ஹிஸ்டரி ஆஃப் தி ஜாம்பி வார் (An Oral History of the Zombie War)’ நாவலை அடிப்படையாகக் கொண்டு 2013ஆம் ஆண்டு முதல் திரைப்படம் உருவாக்கப்பட்டது. மார்க் ஃபோர்ஸ்டர் இயக்கிய அந்தப் படம் உலகளவில் 540 மில்லியன் அமெரிக்க டொலர்களுக்கும் அதிகமான வசூலைப் பெற்றது.
‘World War Z’ தொடர்ச்சிப் படத்தை உருவாக்குவதற்கான முயற்சிகள் பல ஆண்டுகளாக இடம்பெற்று வந்த போதிலும், பல்வேறு காரணங்களால் அவை முன்னேறாமல் இருந்தன. இயக்குநர் டேவிட் ஃபின்சருடன் உருவாக்க திட்டமிடப்பட்ட பதிப்பும் 2019ஆம் ஆண்டு கைவிடப்பட்டது. இந்நிலையில், 2026ஆம் ஆண்டு ஏப்ரலில் Paramount நிறுவனம் தொடர்ச்சிப் படம் செயலில் உள்ளதாக அறிவித்திருந்தது. தற்போது பிராட் பிட் மீண்டும் இணைவதும் எட்வர்ட் பெர்கர் இயக்குநராக பொறுப்பேற்பதும் திட்டத்திற்கு புதிய முன்னேற்றத்தை ஏற்படுத்தியுள்ளது.
