வெளிநாட்டு வேலை வாய்ப்பினை பெற்றுக்கொள்வதற்காக தனது அடையாளத்தை முற்றாக மாற்ற கைரேகை அறுவை சிகிச்சை செய்து, வெளிநாட்டில் மோசடியாக வேலை செய்ய திட்டமிட்டிருந்த இருவரை ஹைதராபாத் பொலிசார் கைது செய்துள்ளனர்.
இச்சம்பவம் தொடர்பாக மேலும் தெரியவருவதாவது
ஆந்திரப் பிரதேச மாநிலம் கடப்பா மாவட்டத்தைச் சேர்ந்தவர்கள் 39 வயது மற்றும் 25 வயதான இருவரும் வளைகுடா நாடான குவைத்தில் கட்டடத் தொழிலாளர்களாக பணியாற்றியுள்ளனர்.
இவர்கள் இருவரும் குற்றச் செயலில் ஈடுபட்டதால் தண்டிக்கப்பட்டு, மீண்டும் இந்தியாவுக்கு திருப்பி அனுப்பப்பட்டுள்ளனர். இந்நிலையில் மீண்டும் மோசடியாக குவைத் செல்ல இருவரும் திட்டமிட்ட நிலையில், கைரேகை அறுவை சிகிச்சை செய்ய அவர்கள் முடிவெடுத்தனர்.
இவர்களை வெளிநாட்டிற்கு அனுப்ப கைரேகை மாற்று அறுவை சிகிச்சை செய்து வைப்பதாக அதே பகுதியைச் சேர்ந்த எக்ஸ்ரே இயக்குனர் , எக்ஸ்ரே தொழில்நுட்பவியலாளர் மற்றும் அவரது உதவியாளர் ஆகிய மூவரும் உறுதியளித்து இதற்காக 25 ஆயிரம் ரூபாயை வாங்கியுள்ளனர்.
அறுவை சிகிச்சை தொடர்பாக பொலிசாருக்க கிடைத்த இரகசிய தகவலையடுத்து அறுவை சிகிச்சைக்காக தயார் நிலையில் இருந்த அனைவரையும் தனியார் விடுதி ஒன்றில் வைத்து கைது செய்துள்ளனர்.
இந்த அறுவைசிகிச்சை குழுவினர் இதுவரை கேரளா, ராஜஸ்தான் என பல்வேறு மாவட்டங்களை சேர்ந்த 11 பேருக்கு கைரேகை அறுவை சிகிச்சை மேற்கொண்டுள்ளமை ஆரம்ப கட்ட விசாரணையில் தெரியவந்துள்ளது.
