யாழ்ப்பாணம் செம்மணி பகுதியில் மேற்கொள்ளப்பட்ட அகழ்வாராய்ச்சியின் மூன்றாம் கட்டப் பணிகளில் 572 பேரின் மனித எச்சங்கள் கண்டெடுக்கப்பட்டுள்ளன. இதில் குழந்தைகள் மற்றும் சிசுக்களின் எச்சங்களும் அடங்குவதாக தெரிவிக்கப்பட்டுள்ளது.
கடந்த பெப்ரவரி மாதம் தகன மைதானத்தை விரிவுபடுத்துவதற்காக தொழிலாளர்கள் நிலத்தை தோண்டியபோது மனித எச்சங்கள் கண்டுபிடிக்கப்பட்டதைத் தொடர்ந்து அகழ்வாராய்ச்சி ஆரம்பிக்கப்பட்டது. இதுவரை கண்டெடுக்கப்பட்ட எச்சங்கள் மற்றும் தனிப்பட்ட பொருட்களில் வளையல்கள், பாடசாலைப் பை மற்றும் குழந்தைகளுக்கான பால்போத்தல் உள்ளிட்டவை அடங்குகின்றன.
செம்மணி பகுதியில் 1990களில் நூற்றுக்கணக்கானோர் புதைக்கப்பட்டதாக முன்னர் நீதிமன்றத்தில் சாட்சியமளிக்கப்பட்டிருந்தது. அந்த தகவலின் அடிப்படையில் 1999ஆம் ஆண்டிலும் அப்பகுதியில் அகழ்வுப் பணிகள் இடம்பெற்றிருந்தன. தற்போதைய கண்டுபிடிப்பு அந்தப் பகுதியில் காணாமல் போனவர்களின் குடும்பங்களிடையே மீண்டும் பல கேள்விகளை எழுப்பியுள்ளது.
எனினும், கண்டெடுக்கப்பட்ட எச்சங்கள் யாருடையவை, அவர்கள் எவ்வாறு உயிரிழந்தனர் என்பவை இதுவரை உறுதிப்படுத்தப்படவில்லை. DNA பரிசோதனைகள் உள்ளிட்ட தடயவியல் ஆய்வுகள் மேற்கொள்ளப்பட வேண்டியுள்ளதாக தெரிவிக்கப்பட்டுள்ளது. தொல்லியல் குழுவின் இடைக்கால அறிக்கை செப்டம்பர் இறுதிக்குள் நீதிமன்றத்தில் சமர்ப்பிக்கப்படவுள்ளதாக தெரிவிக்கப்பட்டுள்ளது.
இதேவேளை, இந்த அகழ்வுப் பணிகள் தொடர்பான விசாரணைக்கு அரசாங்கம் ஒத்துழைத்து வருவதாக தெரிவிக்கப்பட்டுள்ளதுடன், கடந்தகால காணாமல்போனோர் தொடர்பான உண்மைகளை கண்டறிய விரிவான விசாரணை நடத்தப்பட வேண்டும் என பல்வேறு தரப்பினரும் கோரிக்கை விடுத்துள்ளனர்.
