மட்டக்களப்பு ஆனைப்பந்தி இந்து மகளிர் கல்லூரியின் வருடாந்த பரிசளிப்பு விழா பாடசாலை அதிபர் திருமதி நி.பேரின்பராஜா தலைமையில் பாடசாலையின் பிரதான மண்டபத்தில் கடந்த செவ்வாய்க்கிழமை பிற்பகல் 2.30 மணிக்கு இடம்பெற்றது.
இந்நிகழ்வுக்கு, பிரதம அதிதியாக மட்டக்களப்பு வலயக்கல்வி அலுவலகத்தின் திட்டமிடல் பிரதிக்கல்விப்பணிப்பாளர் திருமதி சி சுபாகரன் கலந்து கொண்டிருந்தார்.
கௌரவ அதிதிகளாக மட்டக்களப்பு மேற்கு வலயக்கல்வி அலுவலகத்தின் கல்வி அபிவிருத்தி பிரதிக்கல்விப் பணிப்பாளர் திருமதி ரி உதயகரன் மற்றும் மட்டக்களப்பு வலயக்கல்வி அலுவலகத்தின் கல்வி அபிவிருத்தி பிரதிக்கல்விப் பணிப்பாளர் திரு என் குகதாசன் ஆகியோர் கலந்து கொண்டிருந்தனர்.
இதன்போது, 2023 ஆம் கல்வி ஆண்டில் பாடசாலை மட்டத்தில் அனைத்து விடயங்களிலும் முதல் நிலையை பெற்ற மாணவர்கள், வலய , மாவட்ட, மாகாண மற்றும் தேசிய மட்ட போட்டிகளில் சாதித்த மாணவிகள் பதக்கங்கள் சான்றிதழ்கள் வழங்கி கௌரவிக்கப்பட்டனர்.
மேலும் இப்பரிசளிப்பு நிகழ்வில் கல்லூரியின் மாணவிகளின் நடனம், பாடல், நாடகம் போன்ற கலை நிகழ்வுகளும் அரங்கேற்றப்பட்டது.
இந்நிகழ்வில், ஓய்வு நிலை மேலதிக மாகாண கல்விப் பணிப்பாளர் திரு. எம் பவளகாந்தன், ஓய்வு நிலை வலயக்கல்விப் பணிப்பாளர் திருமதி.எஸ் சக்கரவர்த்தி, ஓய்வு நிலை பொலிஸ் அதிகாரி மட்டக்களப்பு திரு எஸ் .அன்புராஜா, மட்டக்களப்பு இந்து மகளிர் மன்ற தலைவி திருமதி ஜீ .உதயகுமார் மற்றும் உறுப்பினர்கள், மட்டக்களப்பு கல்வி வலயத்தின் அதிபர்கள், மட்டக்களப்பு ஆனைப்பந்தி ஸ்ரீ சித்தி விக்னேஷ்வரர் ஆலய பிரதம குரு மற்றும் திருத்தந்தை ஜோர்ஜ் ஜீவராஜ், மட்டக்களப்பு ஆனைப்பந்தி இந்து மகளிர் கல்லூரியின் பாடசாலை அபிவிருத்தி நிறை வேற்றுக்குழு செயலாளர் திரு.வி .சுதாகரன் மற்றும் உறுப்பினர்கள்,
ஆசிரியர்கள், பெற்றோர்கள் மற்றும் நலன்விரும்பிகள் ஆகியோர் கலந்து கொண்டனர்.
